ЦХИНВАЛ, 25 мар — Sputnik. Гуырдзыстоны 50 æмбæстаджы ауагътой æртыццæджы æнæразыдзинады митинг Хуссар Ирыстоны паддзахадон арæныл — Цхинвалы районы Икъортайы хъæуы цур, фехъусын кодтой ПÆК-ы пресс-службæйы.
Ахæм акци ма ам уагъд æрцыд 21 марты дæр. Хайад дзы уæд райстой сæдæмæ æввахс агрессивон æвзонг адæймаджы. ПÆК-ы информацимæ гæсгæ, митингы организатортæ уыдысты Гуырдзыстоны экс-президент Михаил Саакашвилийы фарсхæцджытæ.
"Паддзахадон æдасдзинады комитетмæ æрбацæуы информаци РХИ-ы паддзахадон арæныл Гуырдзыстоны æрдыгæй Икъортайы хъæуы цур ног провокацитæ саразыны фæдыл. 23 марты та ацы районы ногæй арæзт æрцыд митинг, цыран хайад райстой 50 гуырдзиаг æмбæстаджы. Ацы хатт митингы хайадисджыты æрбакодтой арæны цурмæ, уый нымæцы полицийы машинæтыл дæр", — загъта ПÆК-ы кусæг.
Ведомствӕйы банысан кодтой, гуырдзыстойнаг æмбæстæгты хайадистимæ митингтæ арæнхъахъхъæнджытæ кæй нысан кæнынц 13 мартæй фæстæмæ, хуссарирыстойнаг территорийыл арæнмæ æнгом зынгсирвæзтты ныхмæ таг аразыны куыстытæм куы æрæвнæлдтæй, уӕдӕй.
