ЦХИНВАЛ, 7 окт — Sputnik. Цæрджыты иумæйаг сфыстæн Хуссар Ирыстоны ис стыр социалон-экономикон æмæ политикон нысаниуæг. Æрæмбырдгонд бæрæггæнæнтæ фадат ратдзысты фæбæрзонддæр кæнын республикæйы райрæзты æмбæлон нывæзтытыл куыст, загъта æртыццæджы журналисттæн Статуправленийы сæргълæууæг Тыбылты Инал.
Хуссар Ирыстоны 15-30 октябры уагъд æрцæудзæн цæрджыты иумæйаг сфыст. Ацы мадзал фыццаг хатт æрцæудзæн уагъд республикæйы ног историйы. Хуссар Ирыстоны цӕрджыты сфыст фӕстаг хатт уагъд рцыд Советон Цæдисы дуджы — 1989 азы.
"Сфысты фæстиуджытæ æвæрд æрцæудзысты алыхуызон социалон æмæ экономикон нывæзтыты бындуры, уый та хорзæрдæм бандавдзæн се ‘ххæст кæныны эффективондзинадыл. Уымæй дарддæр ма сфыстæн ис политикон нысаниуæг. Хуссар Ирыстон у æрыгон, фæлæ хæдбар паддзахад æмæ йæм хъуамæ уа дырыс бæрæггæнæнтæ йæ цæрджыты тыххæй", — загъта Статуправленийы сæргълæууæг пресс-конференцийы рæстæджы.
Йæ ныхæстæм гæсгæ, сфыстмæ цæттæгæнæн куыстытæ уыгъд цыдысты 18 мæйы дӕргъы.
Статуправленийы сæргълæууæг фехъусын кодта, ацы азы кӕронмӕ кӕй фӕбӕрӕг уыдзысты сфысты развæлгъау бӕрӕггӕнӕнтӕ ӕмӕ 2016 азы райдианы та адӕмӕн фехъусын кӕндзысты сфысты итогон фӕстиуджытӕ.
"Фыццаг хатт цæрджыты сфыст уагъд æрцæудзæн дунейон домæнтæм гæсгæ, ацы къабазы дунейы фæлтæрддзинадыл æнцойгæнгæйæ. Сфыст фыццаг хатт кæй уадзæм, уымæ гæсгæ бындурон фазæ бацахсдзæн 16 боны. Уый фæстæ цæрджыты сфыст уагъд цæудзæн дæс азы мидæг иу хатт ", — загъта Тыбылты Инал.
Хуссар Ирыстоны цӕрджыты сфыст фӕстаг хатт уагъд ӕрцыд 1989 азы. Республикӕйы цӕрджыты нымӕц уӕд уыд 98,5 мин адӕймаджы. Уыдонӕй 65 минӕй фылдӕр ирӕттӕ, 28 мин гуырдзиӕгтӕ, дыууӕ мин уырыссӕгтӕ. Иннӕтӕ — дзуттаг, сомихаг ӕмӕ ӕндӕр нациты минӕвӕрттӕ.
