Цхинвалмӕ бахизæны хуыздӕр эскизы конкурс æрымбырд кодта 25 проекты

© Sputnik / Алексей КовалевПервый снег в Цхинвале
Первый снег в Цхинвале - Sputnik Хуссар Ирыстон
Рафыссын
Хуссар Ирыстоны сæйраг горæтмӕ бацæуæны æддаг бакасты проектты конкурсмæ сæ куыстытæ бавдыстой Хуссар æмæ Цæгат Ирыстоны 25 нывгæнæджы. Горæты администрацийы минæвæрттæ равзардзысты уыдонæй хуыздæр проект.

ЦХИНВАЛ, 6 дек — Sputnik, Козаты Диана. Цхинвалмӕ цæгаттаг æрбацæуæны эскизон проектты конкурсмæ сæ куыстытæ ӕрбавдыстой Хуссар æмæ Цæгат Ирыстоны нывгæнджытæ. Ныр Цхинвалы горæтарæзтады совет ахуыр кæны куыстытæ, цæмæй дзы равзара иууыл аккагдæры, загътой Sputnik мэрийы пресс-службæйы.

Горæты администраци ацы конкурс расидт августы кæрон. Мадзал цæуы горæтмӕ æрбахизæн сфæлындыны хъуыддаджы хуыздæр архитектурон уынаффæ рахæссыны оххыл.

"Ӕдæппæт конкурсмæ сæ куыстытæ бавдыстой 25 нывгæнæджы. Уыдонӕй 10 сты Хуссар Ирæй, 15 та — Цæгат Ирыстонæй. Се ʻхсæн куыд фæлтæрд нывгæнджытæ — Цхуырбаты Тамерлан, Хуыбецты Александр, афтæ ма йæ горæты æддаг хуызмæ уазал ахаст кæмæн нæй, ахæм адæм дӕр. Уыдонæй иу у этнограф ӕмӕ фыссӕг Мæргъиты Ирбег", — загъта мэрийы пресс-секретарь Коцты Зӕринӕ.

Конкурсы хайад райсыны сæйраг домæн уыд проект националон стилы саразын. Ныр æппæт куыстытæй хъæуы равзарын хуыздæр, ацы хъуыддаджы архайдзысты канд горæтарæзтады советы уæнгтæ нæ, фæлæ ма горæты цæрджытæ дæр.

Цхинвал - Sputnik Хуссар Ирыстон
Цхинвалы мэрия ӕвзары горӕтмӕ бацӕуӕны хуыздӕр эскиз

"Цхинвалы мэр Ӕлборты Алан бахæс кодта проектты адæмæн æвзарынмæ бавдисын. Уыдон мыхуыр æрцæудзысты горæты администрацийы сайт æмæ æндæр дзыллон информацийы фæрӕзты. Гæнæн ис, арæзт æрцæуа чысыл равдыст дæр, уыцы фарст нырма кæронмæ скъуыддзаг нæу", — банысан кодта уый.

Ацы хъуыддагӕн цас финансон фæрæзтæ æрцæудзæн хицæн, стæй проект чи ʻххæст кæндзæн. уый дæр нырма бæрæг нæу.

Уæдмæ та та столицæмæ бахизæны лæууы æрмæстдæр 2008 азы хæсты фæстæ æвæрд стенд уæлфыстимæ "Город-герой Цхинвал".

Ног хабӕртты лентӕ
0