ЦХИНВАЛ, 3 фев — Sputnik, Плиты Фатимӕ. Цхинвалы националон кафты фестивалы равзæрстой республикӕйы сывæллæтты хуыздæр хореографион колллектив, фехъусын кодтой Sputnik Ахуырады министрады.
Ирон хореографийы фестиваль Хуссар Иры цæуы 2011 азæй фæстæмæ. Ацы мадзалы фæрцы хатдзæгтæ скæнынц скъолайы кафты кружокты куыстӕн æмæ скъолаты ирон хореографи амоныны æмвæзадæн.
"Фыццаг бынат ацы аз рахицæн кодтой Цхинвалы скъола-интернатæн, дыккаг бынат адих кодтой Дзауы астæуккаг скъола æмæ Дзауы скъола-интернат. Ӕртыккаг бынат та ахаста Цхинвалы фыццæгæм скъола. Уымӕй дарддӕр ма фестивалы Гран-при та лӕвӕрд ӕрцыд столицӕйы 5-ӕм скъолайӕн", — радзырдта министрады уӕлӕмхасон ахуырады хайады хистӕр Джиоты Эльза.
Уый ма банысан кодта, фестивальмæ ацы аз кӕй бахастой ӕрмӕстдӕр классикон ирон кæфтытæ — "Симд" æмæ "Хонгæ". Стыр скъолатæ сæ арæхстдзинад æвдыстой ирон националон хореографийы дзындз — "Симд" æххæст кæнынæй, чысыл скъолатæ та кафыдысты "Хонгæ".
"Фестивалы азæй-азмæ бӕрзонддӕр кæнынц коллективты нымæц æмæ чысыл кафджыты архæстдзинад. Ацы аз мадзалы архайдта 14 коллективы. Хъуамӕ уыдаиккой 15, фӕлӕ, хъыгагæн, фæндагон уавæртæ фадат нæ радтой Ленингоры районы Ӕмдзæрины скъолайы коллективæн æрцæуын", — бафтыдта йæ ныхæстæм Джиоты Эльза.
Сывæллӕтты ралæудæн саргъ кодта компетентон жюри зындгонд хореографты скондæй, æртыццæджы та гала-концерты рæстæджы коллективтæ райстой сæ хорзæхтæ æмæ лæвӕрттæ.
