ЦХИНВАЛ, 8 июн — Sputnik. Хуссар Ирыстоны адæмон артисткæ, поэтессæ æмæ æхсæнадон архайæг Галуанты Людмилайы 80-ы юбилеймæ мыхуыр æрцыд фотоальбом "Сцена сквозь столетия". Уымæй дарддæр ма, мыхуыр æмæ информацийы комитеты рауагъдон нывӕзтмæ гæсгæ, рацыдысты йæ поэтикон æмбырдгонд æмæ ‘мдзæвгæтыл арæзт зарджыты диск, фехъусын кодта Sputnik рауагъдад "Республика"-йы хистæр Хъоцыты Андрей.
Галуанты Людайæн йæ хæдзар басыгъд 2008 азы хæсты рæстæджы, уыимæ иумæ фæнык фестад йæ исад иууылдӕр. Сылгоймагæн иуыл катайаг ссис, арт кæй скуынæг кодта йæ архивтæ æмæ æппæт къамтæ. Рауагъдмæ бацыдысты ирон театры ирддæр минæвары сценæйыл дæсгай æзты дæргъы сæххæстгонд фæлгонцты нывтæ, кæцытæ æмбырд цыдысты Галуанты Людмилæйæн йæ коллегаты æмæ хиуæтты архивты.
"Фотоальбом рацыд Культурæйы министрады заказмæ гæсгæ. Къамтæ æмбырд кодтам мургай, баххуыс нын кодтой Дзуццаты Тамерлан, Цхуырбаты Татьяна æмæ Гугкаты Эвелина. Чиныг лæвар у канд актрисæйæн нӕ, фӕлӕ ма Хуссар Иры дзыллæйæн дæр", — радзырда рауагъдады хистæр.
Фотоальбомы фæрцы афæлгæсæн ис Галуанты Людмилайы сценæйон фæндагыл. Ис дзы йӕ иуыл бындурондæр фæлгонцтæй иу — спектакль "Авд цухъхъайы" зынгхуыст 7 фырты ныййарæджы роль, кæцы артисткæ рахаста 40 азы дæргъы æмæ йæ сæххæст кодта æртæ хатты сценæйыл.
"Фотоальбом бацæттæ кæныныл цыд гуырахстджын куыст — къамты фылдæр бæрц уыдысты зæронд, стæй сбæлвырд кæнын хъуыд æвæрæг режиссер æмæ спектаклы нæмттæ дæр. Хъыгагæн, цы ирд фæлæнцтæ сæххæст кодта сценæйыл, уыдонæн се ‘ппæт нæ къухы нæ бафтыдысты", — банысан кодта Хъоцыты Андрей.
Фотоальбом нырма рацыд 140 экземплярæй, фæлæ фæстæдæр, рауагъдады хистӕры ныхӕстӕм гӕсгӕ, кæд бантыса баххæст кæнын æрмæг, уæд уый рацæудзæн ногæй рауæрæхдæргонд хуызы.
Хуссар Ирыстоны адæмон артисткæйы юбилейы цытæн бацæттæгонд æрцыд сæрмагонд проект, кӕцыйы фæлгæтты ма рацыдысты йе ‘мдзæвгæты дыууæтомон чиныг æмæ йæ уацмысты бындурыл арӕзт зарджыты диск.
