ЦХИНВАЛ, 12 дек — Sputnik, Козаты Диана. Уæрæсейы финансон æххуысыл, Хуссар Ирыстоны социалон-экономикон райрæзты фæдыл инвестицион программæйы реализацийыл æруынаффæ кæндзысты уæрæсейаг-хуссарирыстойнаг æхсæнхицауадон къамисы (ӔХК) радон рабадтыл, фехъусын кодтой Sputnik хицауады пресс-службæйы.
ӔХК рабадт уагъд æрцæудзæн Цхинвалы æртыццæджы. Рабадт уагъд хъуамæ æрцыдаит 27 ноябры, фæлæ дыууæ фарсы бадзырдмæ гæсгæ, æргъæвд æрцыд фæстæдæр рæстæгмæ.
"Ӕртыццæджы Цхинвалы æмсæрдæрттæ — УФ-йы хицауады сæрдары хæдивæг Александр Хлопонин æмæ РХИ-ы хицауады сæрдар Пухаты Эрикы къухдариуæгадæй уагъд æрцæудзæн Ӕхсæнхицауадон къамисы радон рабадт", — загътой пресс-службæйы.
Фембæлды рæстæджы нывæндынц æруынаффæ кæнын Хуссар Ирыстоны соцэкономрайрæзтæн Уæрæсейы финансон æххуысы фарстытыл, ныры Инвестпрограммæмæ барастгæнинæгтæ бахæссыныл. Уымæй дарддæр ма, рабадты хайадисджытæ æрдзурдзысты Хуссар Ирыстоны скъолаагъоммæ æмæ иумæйаг ахуырады хызæджы модернизацийы нывæзты реализацийыл, æнæниздзинад хъахъхъæнынады системæ æмæ цæрджыты цардифтонгады объектты эксплуатацийы структурæйы модернизацийы фæдыл мадзæлтты нывæзтыл.
ӔХК-ы рабадты сæйраг фарстытæй иу суыдзæн 2018—2019 азтæн инвестпрограммæйы финанскæнынады структурæ æмæ мадзæлттæ сфидар кæнын.
