ЦХИНВАЛ, 14 авг — Sputnik. Хуссар Ирыстоны президент Бибылты Анатолий æмæ Цæгат Ирыстоны сæргълæууæг Битарты Вячеслав фембæлдысты сæрдыгон культурон-ахуырадон курс "Этнолагерь-2017"-ы хайадисджытимæ, кæцы арæзт æрцыд æхсæнадæмон проект "Аланты фæд"-ы фæлгæтты. Фембæлд уагъд æрцыд Хетæгкаты Къостайы Мемориалон хæдзар-музейы Нары хъæуы, хъусын кæны президенты пресс-службæ.
Проекты фæлгæтты 34 адæймаджы – Турк, Франц, Казахстан, Таджикистан, Венгри, Латви, Донецкаг адæмон республикæйы цæрæг ирæттæ æрцыдысты историкон Фыдыбæстæмæ æвзаг, националон истори æмæ традицитæ сахуыр кæнынæн.
Фембæлды архайджыты раз раныхасы, Бибылты Анатолий загъта бузныг проекты организатортæн, дунейы алы къуымты цæрæг ирæтты æрбангом кæныны фæдыл куысты тыххæй, бахахх кодта фембæлды бынаты нысаниуæг дæр — ирон литературæйы бындурæвæрæг Хетæгкаты Къостайы райгуырæн къуым – Нары хъæуы.
"Абоны фембæлд уагъд цæуы Ирыстоны центры, цы ран иу кæнынц нæ бæстæйы хуссар æмæ цæгат. Хетæгкаты Леуаны фырт Къостайы æмдзæвгæтæ зонынц не ′мзæххонтæ иууылдæр, кæм фæнды ма цæрой. Хуыцауæн бызныг, мах райдыдтам агуырын нæ уидæгтæ", — загъта уый.
Хуссарирыстойнаг паддзахады сæргълæууæг ма банысан кодта, Европæйы не ′мзæххонты тыхтæй уагъд кæй цæуынц бирæ мадзæлттæ, ирæтты культурон бастдзинæдтæ фæтыхджындæр кæныны нысанæн æмæ æрсидт алкæмæдæр, цæмæй сæ гæнæн уæвгæйæ исой хайад.
Проекты хайадисджытæ дæр дзырдтой бузныджы ныхæстæ проект "Аланты фæд"-ы организатортæн, зæгъгæ сын уый дæтты фадат кæрæдзимæ æнгомдæр æрбалæууын æмæ историкон уидæгтæ ма рох кæнын.
Фыццаг хатт этнолагерь "Аланты фæд" ацыд Цæгат Ирыстоны 2015 азы.
