ЦХИНВАЛ, 22 янв — Sputnik. Хуссар Ирыстоны Ленингоры районы 25 азы фӕстӕ ногӕй скуыстой стационарон телефонтӕ, фехъусын кодта Sputnik РХИ бастдзинад ӕмӕ массон коммуникациты комитеты сӕрдар Джиголаты Хасан.
Республикӕйы иууыл дӕрддзӕф район бирӕ ӕзты дӕргъы уыд Гуырдзыстоны юрисдикцийы бын ӕмӕ йын республикӕйы иннӕ хӕйттимӕ ницы бастдзинӕдтӕ уыд. Ныр республикӕйы хицауады фӕрцы Ленингор цадӕггай лӕууы йӕ къахыл.
"Ленингоры стационарон бастдзинад нӕ уыд 90-ӕм азтӕй фӕстӕмӕ. 2015 азы кӕрон дзы скуыстой фыццаг стационарон телефонтӕ. Ныридӕгӕн уал баиу кодтам 100 абоненты, уыдон фылдӕр бӕрцӕй сты куыстуӕттӕ, фӕлӕ фӕстӕдӕр баиу кӕндзыстӕм цӕрджыты дӕр", — загъта комитеты сӕрдар.
Уый ма радзырдта, электробастдзинады ӕхсӕнадӕмон цӕдис кӕй рахицӕн кодта Хуссар Ирыстонӕн хисӕрмагонд код (850-2). Ныр, Хуссар Ирыстонмӕ фӕсарӕнтӕй дзургӕйӕ, хъӕуы сисын ацы префикс.
