ЦХИНВАЛ, 5 мая — Sputnik. Цæгат Ирыстоны полици æрцахста организацион фыдгæнон къорд, кæцы сарæзта цалдæр радавды Дзæуджыхъæуы коммерцион куыстуæттæй, хъусын кæны мидхъуыддæгты министрады пресс-службæ.
Мидхъуыддæгты министрады бæрæггæнæнтæм гæсгæ, 2015 азы декабрæй ныры онг къорды уæнгтæ — цæгаткавказаг республикæтæй иуы цæрджытæ — сарæзтой 15 радавдæй фылдæр, бакæнгæ зианы иумæйаг бæрц у цалдæр милуаны.
Къорды уыд æртæ уæнджы, уыдон нымæцы цæгагкавказаг уæлдæр ахуырадон уагдоны юридикон факультеты 22-аздзыд студенткæ.
Давыны хъуыддаг раргом кæнынмæ æрæвнæлдта сæрмагондæй арæзт слестгæнæн-оперативон къорд, фæдагуырды цыд та хисæрмагонд контролмæ райста Цæгат Ирыстоны мидхъуыддæгты министр Михаил Скоков.
"Фыдгæнон къорды уæнгты радон "æнтыстджын" фыдракæнды фæстæ æрцахстой Дзæуджыхъæуы Сӕудӕджерадон районы кæрон дæлстанцы цур. Цы машинæйыл хъавыдысты республикæйæ ацæуын, уым оперативон кусджытæ ссардтой æрмæст давд æхцатæ æмæ хæзнатæ нæ, фæлæ ма сæ фыдракæндтæ цы мигæнæнты руаджы арæзтой, уыдоны æнæхъæн арсенал", — банысан кодтой Мидхъуыддæгты министрады.
Автомашинæ басгæрсты рæстæджы ма ссардтой хæцæнгарз дæр. Уæлдай цымыдис та сæм сæвзæрын уодта фыссæн чиныг, цæй мидæг нысан кодтой цы коммерцион объекттæм хъавыдысты давынмæ бацæуын, уыдон. Полицийы кусджытæ банымадтой Дзæуджыхъæуы куыстуæттæй 45-æй фылдæр.
