ЦХИНВАЛ, 5 июл — Sputnik, Хъотайты Мария. Уӕрӕсе ӕмӕ Хуссар Ирыстоны МХМ минӕвӕрттӕ бабӕрӕг кодтой бӕстыхай Цхинвалы, цы ран фидӕны ӕрбынат кӕндзӕн иумӕйаг информацион-координацион центр (ИКЦ).
Уӕрӕсе ӕмӕ Хуссар Ирыстоны мидхъуыддӕгты министрӕдтӕ къуырисӕры бафыстой иумӕйаг информацион-координацион центр саразыны фӕдыл бадзырд.
Бынат ын равзӕрстой "Мӕскуыйаг "микрорайоны цӕгатварс. Раздӕр ам уыд арӕзтадон фирмӕ, фӕстаг рӕстӕг бӕстыхай уыд афтид.
Уӕрӕсейы МХМ сӕргълӕууӕджы хӕдивӕг Игорь Зубовы ныхӕстӕм гӕсгӕ, бӕстыхай цалцӕг кӕнынмӕ ӕрӕвналдзысты 2017 азы райдайӕны.
Зубов банысан кодта, ИКЦ хистӕры кӕй хъӕуы снысан кӕнын мӕйы ӕмгъуыдмӕ, уымӕн ӕмӕ уый хъуамӕ скъуыддзаг кӕна организацион-хӕдзарадон фарстытӕ. Зубовы ныхӕстӕм гӕсгӕ, бӕстыхай йӕхӕдӕг ифтонг уыдзӕн нырыккон техникӕйӕ.
"Уӕрӕсейы фарсӕн принципиалон нӕу, чи слӕудзӕн ИКЦ-ы сӕргъ — уадз уый уӕд Хуссар Ирыстоны МХМ-ы минӕвар. Фыццаг этапыл хъӕудзӕн скъуыддзаг кӕнын организацион-хӕдзарадон фарстытӕ, бынӕттон минӕварӕн та уый уыдзӕн ӕнцонвадатдӕр. Ротацимӕ гӕсгӕ, кӕд фыццаг фондз аз центрӕн къухдариӕгад кӕна хуссарирыстойнаг минӕвар, уӕд иннӕ фондз аз та уый уыдзӕн уӕрӕсейаг минӕвар", — загъта уый.
Йӕ ныхӕстӕм гӕсгӕ, ИКЦ саразыныл куыст цыд ӕртӕ азы. Центры бындур конд уыдзӕн хуссарирыстойнаг милицийы кусджытӕй. Уӕрӕсе та фӕнд кӕны РХИ МХМ-мӕ йӕ кусджыты минимум ӕрӕрвитын, цӕмӕй уыдон баххуыс кӕной ИКЦ модернизацийы хъуыддаджы.
