ЦХИНВАЛ, 3 июл — Sputnik. Дзæуджыхъæуы фæбæрæг сты ирон æвзагыл литературон конкурс "Бинонтæ. Мыггаг. Фыдыбæстæ"-йы уæлахиздзаутæ. Æртæ хицæн кары категориты равзæрстой аккагдæр куыстытӕ, хъусын кæны епархийы сайт.
Конкурс сорганизаци кодта Дзӕуджыхъӕуккаг алайнаг епархи Аланийы аргъуыд райсыны 1100 азы юбилейы цытæн мадзӕлтты фӕлгӕтты.
Куыстытæ исын райдыдтой ацы аз марты мæйы, æдæппæт сæ уацтæ бавдыстой 100 адæймаджы бæрц. Къамис равзæрста 1, 2, 3 премийы хицæутты æртæ хицæн кары категориты. Иууыл кæстæрыл цæуы 12 азы, иууыл карджындæр та у 80-аздзыд.
Уæлахиздзаутæн Дзæуджыхъæуккаг алайнаг епархийы епископ Леонид радта дипломтæ æмæ æхцайы премитæ.
"Æхсызгон мын у хатдзæгтæ скæнын конкурсæн. Ацы проект уыд фæлварæн æмæ мæн ныфс ис, иннæ аз нын кæй рауайдзæн гуырахстджындæр. Ӕвзаг бахъахъхъæнын алкæцы адæмæн дæр у ахсджиаг. Монон бынтæ, культурæ æмæ фыдæлты рох кæнын нæ уадзы æвзаг, мах та архайæм, цæмæй æвзаг ма сæфа", — хъусын кæны епархийы сайт епископ Леониды ныхæстæ.
Ирон æвзагыл литературон конкурс "Бинонтæ. Мыггаг. Фыдыбæстæ"-йы уæлахиздзаутæ 12-18 азты кары ссисты Къазахты Вероника йæ куыст "Хорз адӕмӕй фарн цӕуы", дыккаг бынат райста Гъуцъунаты Русланы уац "Хъазахъхъаг хъӕу Черноярская. Апостолтӕ Пётр ӕмӕ Павелы номыл аргъуан" æмæ æртыккаг бынат та радтой Лазарты Ахсары эссе "Хъӕдгӕроны аргъуан"-æн.
19-25 азы кары иууыл æнтыстджындæр разындысты Туаты Диана "Цымӕ ӕз дӕр цӕрынӕн райгуырдтӕн?", уый ссис уæлахиздзау. Дыккаг бынат райста Гӕбæраты Сосланы уац "Бинонтæ. Мыггаг. Фыдыбæстæ", æртыккаг бынат та рахицæн кодтой Цхуырбаты Калинайы эссе "Заманхъулӕй суанг Прагӕмæ".
Æртыккаг кары категорийы дӕр рахицæн кодтой æртæ хуыздæр куысты, ам та архайдтой 26 азæй хистæр адæм. Аликаты Фатимайы куыст "Ме 'мдугонтӕ кӕнӕ мӕ фӕндаг Хуыцаумӕ" къамис банымадта иууыл хуыздæрыл, дыккаг бынатыл ацыд Хъауырты Дауры эссе "Иу уынджы стъалытæ" æмæ æртыккаг та сис Бутаты —Хестанты Победайы куыст "Бинонты бӕрӕгбон".
