Джусойты Нафийы премийы фыццаг лауреат ссис дзӕнӕттаг Джыккайты Шамил

© Sputnik / Фатима ПлиеваДжусойты Нафийы номыл преми
Джусойты Нафийы номыл преми - Sputnik Хуссар Ирыстон
Рафыссын
ПККЗ "Чермен"-ы цытджын уавӕры хӕрзаудӕн фонд "Амонд"-ы бындурӕвӕрӕг Хуыгаты Ростик фыццаг преми диплом æмæ сӕрмагонд майдан Джусойты Нафийы фæлгондзимӕ радта Шамилы чызг Зӕринӕйӕн.

ЦХИНВАЛ, 16 май — Sputnik, Плиты Фатимӕ. Зынгӕ ирон литературон архайджытӕ Джыккайты Шамил, Наниты Асиат ӕмӕ Багаты Аврам ссисты Джусойты Нафийы номыл премийы лауреаттӕ.

Стыр ахуыргонд, ирон литературӕйы классик ӕмӕ зынгӕ ӕхсӕнадон архайӕг Джусойты Нафийы номыл премитӕй хорзӕх кӕныны церемони цытджын ӕгъдауӕй уагъд ӕрцыд Цхинвалы, ПККЗ "Чермен"-ы. Мадзал нывонд уыд Ирон ӕвзаджы бонӕн.

Конкурс ивгъуыд азы кӕрон расидт хӕрзаудӕн фонд "Амонд", кӕцы сарӕзта РХИ хицауады раздӕры сӕрдар Хуыгаты Ростик. Преми лӕвӕрд ӕрцыд фыццаг хатт, нырӕй фӕстӕмӕ суыдзӕн ӕрвылазон.

Къамисы уӕнгтӕ сусӕг хъӕлӕсӕппӕрсты руаджы 20 куыстӕй равзӕрстой ӕртӕ аккагдӕры, кӕцытӕ ссисты премийы лауреаттӕ.

"Фыццаг бынат райстой дзӕнӕттаг ирон фыссӕг, поэт, драматург ӕмӕ тӕлмацгӕнӕг Джыккайты Шамилы "Ӕвзӕрст уацмыстӕ", премийы дыккаг лауреат ссис фыссӕг Наниты Асиат, кӕцы конкурсмӕ бавдыста йӕ уацмысты ӕмбырдгонд. Ӕртыккаг бынат та райста цӕгатирыстойнаг публицист Багаты Аврам йӕ "Публицистон цикл"-ы тыххӕй", — радзырдта Sputnik мадзалы организатортӕй сӕ иу, фонд "Амонд"-ы директор Челехсаты Хъазбег.

Уӕлахиздзаутӕ хорзӕхджын ӕрцыдысты ӕхцайы премитӕй — фыццаг бынатӕн лӕвӕрд ӕрцыд 150 мин сомы, дыккагӕн — 100 мин сомы, ӕртыккагӕн та — 50 мин сомы.

Хӕрзаудӕн фонд "Амонд"-ы бындурӕвӕрӕг Хуыгаты Ростик фыццаг преми, диплом æмæ сӕрмагонд майдан Джусойты Нафийы фæлгондзимӕ радта Джыккайты Шамилы чызг Зӕринӕйӕн.

Уымӕй дарддӕр, конкурсмӕ йӕ куыстытӕ чи бавдыста ӕмӕ фылдӕр хъӕлӕстӕ чи райста, уыдонӕй ма ӕхсӕз адӕймаджы та райстой грамотӕтӕ.

Хорзӕх кӕныны церемонийы хайад райстой Хуссар Иры хицауады уӕнгтӕ ӕмӕ сфӕлдыстадон кусджытӕ, цӕрджытӕ, ӕрцыд стыр делегаци Цӕгат Ирыстонӕй. Преми дӕттыны рӕстӕджы сӕ арӕхстдзинад равдыстой бынӕттон сфӕлдыстадон коллективтӕ дӕр.

Ног хабӕртты лентӕ
0