ЦХИНВАЛ, 3 фев — Sputnik, Хъотайты Мария. ОБСЕ-ы сӕргълӕууӕг, Австрийы фӕсарӕйнаг хъуыддӕгты министр ӕмӕ Европӕйы министр интеграцийы фӕдыл Себастьян Курц ӕрцыд арӕнмӕ Инциденттӕ ма ӕруадзыны ӕмӕ сӕ аиуварс кӕныны фӕдыл механизмты форматы фембӕлды хайад райсынмӕ Хуссар Ирыстон ӕмӕ Гуырдзыстоны ӕхсӕн нейтралон территорийыл — Эргнеты хъӕуы цур.
Уый загъта, кӕй хъӕуы тох кӕнын тыхгӕнон экстремизмимӕ, ОБСЕ хайадисджытӕ-бӕстӕты ӕхсӕн ӕууӕнк сӕндидзын кӕнын ӕмӕ уӕвӕг конфликттӕ иууылдӕр райхалын.
"Австри йӕ къухмӕ райста ОБСЕ-йы сӕрдариуӕгад 1 январы ӕмӕ уын зӕгъын бузныг ам, Эргнеты фембӕлды тыххӕй. ОБСЕ-ы сӕрдариуӕгады фӕдыл нӕм ацы аз ис ӕртӕ приоритеты — тыхгӕнон экстремизмимӕ тох, ОБСЕ хайадисджытӕ-бӕстӕты ӕхсӕн ӕууӕнк сӕндидзын кӕныны фӕдыл хъӕппӕрис. Афтӕ ма нӕ фӕнды нӕ хайбавӕрд бахӕссын архайгӕ конфликттӕ ӕрбӕстон кӕнынӕн", — загъта Курц.
Сӕйраджыдӕр, уый банысан кодта, "кӕй йӕ фӕнды хъусдарды центры сӕвӕрын хуымӕтӕг адӕмы проблемӕтӕ, кӕцы иууыл тынгдӕр ӕййафы хъыгдард конфликттӕй".
Дарддӕр фембӕлд ацыд ӕнӕ журналистты хайадистӕй цатыры, цы ран Курц ныхас кодта ИӔАМ-ы форматы хайадисджытимӕ 15 минуты бӕрц.
Дарддӕр уый "ӕгас цу" загъта Евроцӕдисы минӕвӕрттӕн ӕмӕ афӕндараст Гуырдзыстоны ӕрдӕм.
Ацы балц Курцӕн ссис фыццаг ИӔАМ-ы фӕзуатмӕ.
ИӔАМ-ы форматы сырӕзты фӕдыл бадзырд райст ӕрцыд Фӕскавказы Ӕдасдзинады фӕдыл Женеваг дискусситыл 2009 азы. Фембӕлдты хайад исынц Хуссар Ирыстон, Гуырдзыстон, ӕмӕ Уӕрӕсейы минӕвӕрттӕ, афтӕ ма ОБСЕ ӕмӕ Евроцӕдисы минӕвӕрттӕ.
