ЦХИНВАЛ, 1 фев — Sputnik, Плиты Фатимæ. Цхинвалы гимнази "Альбион"-ы хореографион къордæн Ахуырады министрад самал кодта сылгоймаджы æмæ нæлгоймаджы национ дарæсы комплекттæ. Дарæс бахуыдта зындгонд хореограф Четион Мая æвзонг нывгæнæг Дзигойты Каринайы эскизтæм гæсгæ.
Ахуырады министрады минæвæрттæ цыппæрæмы æрбаластой кафджытæн сæ лæвæрттæ. Дарæсы амондджын хицæуттæ сæ ног костюмты æрсимдтой уазджыты раз.
Ахуырады министр Гасситы Наталийы ныхæстæм гæсгæ, скъолаты кафты къордтæ национ дарæсæй ифтонг цæуынц рæзгæ фæлтæрты хъомылады паддзахадон монон-фæтквæрдон нывæзты фæлгæтты.
"Ӕрæджы ма ахæм комплекттæ райстой Цхинвалы 12-æм скъолайы кафты коллектив дæр. Фæнд кæнæм ноджы дыууæ скъолайы азы кæронмæ сифтонг кæнын национ дарæсы комплекттæй. Ацы нывæзт æххæст цæудзæн æртæ азы дæргъы. Мах нæ хæсыл нымайæм, цæмæй æппæт скъолаты хореографион къордтæн бахуыйын кæнæм сæрмагонд дарæс", — загъта министр.
Дарæс бахуыйæг Четион Мая мæйы æмгъуыдмæ сцæттæ кодта 11 комплекты чызджытæн, фараст та — лæппутæн.
"Аст къайы сты симды дарæс, æртæ та хонгæйы. Лæппутæн дæр сты уый бæрц симæн дарæс, хонгæйæн та æрмæстдæр иу. Гъæдджын æрмæгæй спайда кодтам иууылдæр – сæрак, хъуын, мельхиор æмæ хорз хъуымац. Иу мæймæ ахæм коллекци сцæттæ кæнын зын уыд, фæлæ хорз бацархайдтам мæ хоимæ иумæ", — радзырдта Четион.
Скъолайы разамынад бузныг загъта Ахуырады министрадæн æмæ Четион Маяйæн сæ лæвары тыххæй.
"Гимнази "Альбион"-ы бæлицтæй та ноджы иу сæххæст ис, абон амондджын дæн. Нæ фæсивæд симдзæн æфстау дарæсы нæ, фæлæ йæхиуæтты. Кæй зæгъын æй хъæуы, æгас къорд ифтонг нæу, фæлæ тырндзыстæм уымæ дæр. Хуыцау зæгъæд æмæ Хуссар Иры æппæт кафджытæн дæр уа национ дарæс", — загъта гимнази "Альбион"-ы директор Гуыцмæзты Ирина.
