ЦХИНВАЛ, 21 фев — Sputnik, Уалыты Диана. Фыдыбӕстӕ хъахъхъӕнӕджыбоны ӕмӕ Хуссар Ирыстоны Хъахъхъӕнынады министрады сырӕзты 25-азон юбилейы цытӕн бӕрӕгбонон мадзал уагъд ӕрцыд ӕртыццӕджы ПККЗ "Чермены". Ӕфсӕддонтӕ ӕмӕ Фыдыбӕстӕ хъахъхъӕнджытӕн раарфӕ кӕнынмӕ ӕрцыдысты делегацитӕ Уӕрӕсе, Абхаз ӕмӕ Донецкаг Адӕмон республикӕты Хъахъхъӕнынады министрӕдтӕй.
Ӕрӕмбырдуӕвджытӕн равдыстой фильм, цыран ӕвдыст цыд Хуссар Ирыстоны хъахъхъӕнджыты хъӕбатырдзинад. Уый фӕстӕ паддзахадон гимны зӕлтӕм ӕрбахастой республикӕйы ӕмӕ Хъахъхъӕнынады министрады тырысатӕ. Хъахъхъӕнынады министры хӕстӕ ӕххӕстгӕнӕг Гассеты Ибрагим раарфӕ кодта йӕ коллегӕтӕн бӕрӕгбоны цытӕн ӕмӕ ӕрдзырдта йӕ дӕлбар министрад куыд ӕмӕ цы уавӕрты сырӕзт, уыдӕттыл.
Республикӕйы президент Бибылты анатолий банысан кодта, 23 февраль кӕй у ӕппӕтадӕмон бӕрӕгбон, кӕцыйӕ цыт кӕны ӕнӕхъӕн республикӕ.
"Фыццаг рады арфӕ кӕнын Хъахъхъӕнынады министрады ӕфсӕддонтӕн ацы бӕрӕгбоны цытӕн. Уыдон ӕнтыстджын куысыл бирӕбӕрцӕй баст у нӕ республикӕйы ӕмӕ йӕ адӕмы хъысмӕт. Ӕмӕ зӕгъӕн ис, уыдон сӕ разы лӕууӕг хӕстӕ иттӕг хорз кӕй ӕххӕст кӕнынц, уыдон фӕрцы мах абон цӕрӕм сабырады", — загъта президент.
Бибылты Анатолий ма бафтыдта, ацы бон ма кӕй хъӕуы уӕлдай банысан кӕнын Фыдыбӕстӕ хъахъхъӕнджыты-сылгоймӕгты сгуыхтдзинӕдтӕ, кӕцытӕ нӕлгоймӕгты ӕмрӕнхъ тох кодтой сӕ бӕстӕйы сӕрыл.
"Нæ зынаргъ, æддейæ бакæсгæйæ къæсхуыр чызджытæ хæсты быдыры равдыстой сæ фыдæлты хуыздæр миниуджытæ — скифаг паддзахты хæстхъомдзинад. Уæлдæр æфсæддон хорзæхты хицау баисты Цоциты Зара, Шорена Деканаидзе, Плиты Мæдинæ. 2008 азы æфсæддон майдан Уæрæсейы президент Дмитрий Медведевы къухæй райста Бестауты Майя", — загъта Бибылты Анатолий.
УФ Хъахъхъæнынады министрады Хуссар æфсæддон зылды командæгæнæджы хæдивæг инæлар-лейтенант Александр Романчук бакаст министры арфæйы тел.
"Зынаргъ хæстон æмбæлттæ, райсут мæ арфæтæ Хъахъхъæнынады министрады сæвзæрды 25 азы юбилейы фæдыл", — дзырдæуыд уым.
Хæларад æмæ æмгуыстады тæгтæ сфидар кæнын æмæ сæ хисæрмагонд хайбавæрды тыххæй президент схорзæхджын кодта Хæларады орденæй УФ, Абхаз æмæ ДАР Хъахъхъæнынады министрадты минæвæртты. Хъахъхъæнынады министрады 25 азы юбилейы цытæн Кады орденæй хорзæхджын æрцыд раздæры министр Валерий Яхновец. Майдантæй хорзæхджын æрцыдысты къорд кусæджы, кæцытæ расгуыхтысты Хуссар Иры хæдбардзинад æмæ территориалон æнæхъæндзинад хъахъхъæныны хъуыддаджы.
Концертон нывæзты фæлгæтты фыдыбæстæ хъахъхъæнджытæн раарфæ кодтой сывæллæтты сфæлдыстадон къордтæ æмæ адæмон инструментты ансамбль "Айзæлд".
