ЦХИНВАЛ, 20 мар — Sputnik, Плиты Фатимæ. Пятигорскы зоопарк "Король"-ы дирекци фæнд кæны Цхинвалы æрбакæнын сæ равдыст, уазæг сырдты хицæуттæ ныридæгæн горæтмæ æрбарвыстой куырдиат, фехъусын кодтой Sputnik Цхинвалы мэрияйы.
Столицæйы уынгтыл фæзынд зоопарчы ʻрцыды тыххæй афишæтæ. Сæ уæлфыстытæм гæсгæ, зоопарк æрбынат кæндзæн Вокзалгæрон фæзуаты 27 мартæй 17 апрельмæ.
"Пятигорскы зоопарк нæм æрбавдыстой куырдиат бынат рахицæн кæныны фæдыл. Зоопарк райсынæн горæты бæззы æрмæстдæр Вокзалгæрон фæзуат. Сæ гæххæттытæй куыд бæрæг у, афтæмæй зоппарчы ис африкæйаг домбайтæ, стайтæ, æрсытæ, бирæгътæ, рувæстæ, маймулитæ, страустæ æмæ пеликантæ", — загъта Sputnik горæты администрацийы фæлхасгæнджыты хайады хистæр Кобесты Маир.
Зоопаркмæ билеты аргъ уыдзæн хистæртæн 200 сомы, сабитæн — 150, æртæ азы онг кæстæртæн та æнæаргъæй.
