Ӕппӕтреспубликон Брейн-ринг

Балц Европæмæ: Хуссар Иры фæсивæд бацæудзысты интеллектуалон тохы

41
(ранӕуӕггонд 11:43 17.04.2018)
Интеллектуалон хъазт "Брейн-рингы" республикон этапы уæлахиздзауæн Фæсивæдон комитет лæвар кæны Европæйы бæстæтæй иумæ экскурсион балц, призертæ та æнæ конкурсæй хиздзысты æппæтуæрæсейон форумтæм

ЦХИНВАЛ, 13 апр — Sputnik, Плиты Фатимæ. Цхинвалы дыууæ къуырийы дæргъы цæудзæн интеллектуалон хъазт "Брейн-Ринг" скъоладзауты æмæ студентты хсæн. Уæлахиздзау командæйæн организатор — Фæсивæдон политикæ, спорт æмæ туризмы комитет — лæвар кæны балц Европæмæ, фехъусын кодтой Sputnik комитеты пресс-службæйы.

"Брейн-Рингы" республикон тур цæудзæн 17 апрелæй 3 маймæ æмæ нывонд уыдзæн Хуссар Иры хæдбардзинад УФ ʻрдыгæй банымады 10 азæн.

"Хайадисджытæ дих сты дыууæ къордыл — скъоладзаутæ æмæ студенттæ. Фыццаджы сты 9-11 кълæсты ахуырдзаутæ, дыккаг къорды та ХИПУ, техникум æмæ колледжты студенттæ. Алкæцы къорды дæр ис фондз адæймаджы. Финалмæ ахиздзæн цыппар командæйы, уыдоны хæсæн уæлахиздзау рабæрæг уыдзæн баллтæм гæсгæ", — загъта уагдоны пресс-секретарь Софа Исаакян.

Уый ма бамбарын кодта интеллектуалон хъазты фарстыты здæхæн. Йæ ныхæстæм гæсгæ, уыдон хауынц Ирыстоны истори, географи, ирон æгъдæуттæ, Нарты кадджытæ, Иры зындгонд гоймæгтæ, райгуырæн бæстæйы зайæгойты æмæ цæрæгойтæм.

"Интеллектуалон тохты республикæйы районты бавдисдзысты Орчъосан, Цъинагар, Къуаиса, Дзау, Бехъмар, Цъунар æмæ Дменисы скъолаты командæтæ. Уæлахиздзауæн Фæсивæдон комитет лæвар кæны экскурсион балц Европæйы бæстæтæй иумæ, призертæ та æнæ конкурсæй хиздзысты æппæтуæрæсейон форумтæм", — бафтыдта пресс-секретарь.

Ӕрдæгфинал æмæ финалы архайджытæ хорзæхджын цæуынц I, II и III къæпхæны дипломтæ æмæ зæрдылдарæн лæвæрттæй. Мадзал аразы Фæсивæды комитет Ахуырады министрады æмархайдæй.

41