ЦХИНВАЛ, 25 май — Sputnik, Плиты Фатимæ. Хуссар Ирыстоны культурæйы министрады Адæмон сфæлдыстады центр рабæрæг кодта фотоконкурс "Хуссар Ирыстон—2018"-ы уæлахиздзаутæ æмæ призерты.
Хæдахуыр къамисджыты куыстытæй хицæн номинациты хуыздæртыл банымадтой Гасситы Зæринæйы куыст "Проводы", Къæбулты Ӕхсары "Ветераны", Мæргъиты Ирбеджы куыстыты сери, Бестауты Ларисайы "Две сестры". Афтæ ма призерты нымæцы сты Цхуырбаты Мария, Туаты Ирина, Гæззаты Тимур æмæ Хаситы Геннадий.
Уæлахиздзаутæ æмæ призерты хорзæхкæныны церемони æмæ сæ куыстыты равдыст ацæудзæн Къостайы скверы хæдбардзинады бон – 29 майы.
Сфæлдыстадон центры хистæр Гуыцмæзты Эльзайы ныхæстæм гæсгæ, æрвылазон конкурсы архайджыты нымæц азæй азмæ кæны фылдæр, сæ арæхстдзинад та хуыздæр.
"Ацы аз æвзарæм 124 куысты ʻхсæн, уæлдай бирæ сты "райгуырæн бæстæйы флора æмæ фауна" номинацийы. Ацы аз нæм æрбахастой сæ куыстытæ 13 къамисæджы, хорз куыстыты нымæц ноджы фæфылдæр. Уымæ гæсгæ равзарын у вазыгджындæр", — банысан кодта уый.
Конкурсантты куыстытæн аргъ кодта сæрмагонд къамис, йе скоды культурæйы министры хæдивæг Дзеранты Джульетта, Центры директор Гуыцмæзты Эльза, Нывгæнджыты цæдисы сæрдар Цхуырбаты Тамерлан æмæ президенты къамисæг Алексей Ковалев.
"Центр культурæйы министрады æххуысæй уадзы ацы конкурс æмæ уымæй разæнгард кæны хæдахуыр къамисджыты. Бирæты зæрдæмæ цæуы ацы сфæлдыстадон хахх æмæ сын конкурс у сæхи сфæлварыны фадат", — загъта Дзеранты Джульетта.
Мадзал цыд цыппар номинацийы – "хуызист", "Цхинвал абон", "цыртдзæвæнтæ æмæ Хуссар Иры фенддаг бынæттæ" æмæ "райгуырæн бæстæйы флора æмæ фауна".
Адæмон сфæлдыстады центр фотоконкурс уадзы ныр цыппæрæм хатт. Фыццаг сæ тыхтæ бафæлвæрдтой 2014 азы. Хицæн æзты конкурсы расгуыхтысты къамисджытæ Гæбæраты Нелли, Габайты Владимир, Хуыгаты Ростислав, Гæззаты Тимур æмæ æндæртæ.
