РХИ драмон театр

"Давд" Хуссар Иры театрӕй: дызӕрдыггаг истори

19
(ранӕуӕггонд 11:18 08.06.2018)
Барадхъахъхъӕнӕг органтӕ бӕрӕг кӕнынц, Мельпомены храмӕй ӕцӕг адавдтой зынаргъ ивтонггарз ӕви уыдон сты нардуатисджыты сау хъуыддӕгтӕ

ЦХИНВАЛ, 7 июн — Sputnik. Хуссар Ирыстоны паддзахадон театрӕй фесӕфт зынаргъ рухсы ифтонггарз. Нардуатон организаци "Эверест" бахатыд хуссарирыстойнаг барадхъахъхъӕнджытӕм ӕххуысы фӕдыл, фӕлӕ давды верси иунӕг нӕу ацы цауы.

Хуссар Ирыстоны Мидхъуыддӕгты министр Наниты Игорь радзырдта Sputnik, давды тыххӕй кӕй базыдтой къуырисӕры, фӕлӕ ацы рӕстӕгмӕ фӕдагуырд нырма не 'рцыд иу хъуыдымӕ — ифттонггарз кӕй баци хуымӕтӕг абырджыты амӕттаг. Уый фӕдыл ма ацы цауӕн ис иу верси.

"Мах кусӕм ныридӕгӕн ӕртӕ боны, уагъд цӕуы фӕдагуырд. Фӕлӕ нырма ницы сбӕрӕг ис, гӕнӕн ис ӕмӕ уыдон сты нардуаты кусджыты сау хъуыддӕгтӕ", — загъта министр.

Йӕ ныхӕстӕм гӕсгӕ, нардуаты кусджытӕ дзурынц, ифтонггарз кӕй ӕрбаластой январы, фӕлӕ ацы ныхӕстӕ сфидар кӕнын йӕ бон никӕмӕн нӕу — документтӕм гӕсгӕ ифтонггарзы алӕвӕрд никуы у фыст.

Афтӕ ма фыдгӕнджытӕ ифтонггарз райстой тынг арӕхстджынӕй, ницы фехӕлдтой — архайдтой куыд ӕцӕг специалисттӕ.

"Ома нардуаты кусджытӕ ӕви цыдӕр кӕронмӕ нӕ сарӕзтой, ӕви ифтонггарз систой ӕмӕ йӕ ахастой. Афтӕ ма сӕ ӕвдисӕндзырдтӕ дӕр ӕмхуызон не сты", — загъта Наниты Игорь.

Уый банысан кодта, йӕ бон кӕй нӕу зӕгъын, давд кӕй ӕрцыд, фӕлӕ уӕддӕр барадхъахъхъӕнӕг органтӕ адарддӕр кӕндзысты сӕ фӕдагуырд, кӕцымӕ баиу сты МХМ хайадтӕ ӕмӕ Генералон прокуратурӕ.

Министр бафтыдта, зианы аргъ кӕй у 900 мин сом.

Арӕзтады министрады, кӕцы у театры арӕзтады заказгӕнӕг, ацы цауы тыххӕй ницы дзурынц ӕмӕ банысан кодтой, уый нардуатисджытӕн сӕхи хъуыддаг кӕй у.

Sputnik-ӕн нырма нӕ рауад нардуатон фирмӕйы къухдариуӕгадимӕ аныхас кӕнын.

Театры арӕзтад, кӕцыйӕн рахицӕн кодтой иу миллиард сомӕй фылдӕр, бирӕ хатты фӕцис критикӕйы бын. Арӕзтад, кӕцы хъуамӕ фӕуыдаит ӕртӕ азы размӕ, ныр дӕр цӕуы, мӕ йӕ кӕд фӕуыдзысты, уый бӕрӕг нӕу.

Тынг диссаг ма у, культурӕйы иууыл ахсджиагдӕр объекттӕй иуы арӕзтад кӕй ӕххӕст кӕны "Эверест", кӕцыйы ныхмӕ Паддзахадон ӕдасдзинады комитет бакодта уголовон хъуыддаг. Амӕйразмӕ Арӕзтады министрады банысан кодтой, нардуатисджытӕн ӕгӕр стыр аванс кӕй бафыстой ӕмӕ уый тыххӕй ныр зын кӕй у уыдон сӕ куыстӕй аиуварс кӕнын.

19