Лицей райста йе скондмӕ 62 фыццагкъласоны

Зонындзинӕдты бӕрӕгбон: куыд сӕмбӕлд Лицей Цхинвалы фыццагкъласонтыл

19
(ранӕуӕггонд 17:43 05.09.2018)
Лицей райста йе скондмӕ 62 фыццагкъласоны, сӕ хистӕр ӕмбӕлттӕ сын сарӕзтой ӕцӕг бӕрӕгбон

ЦХИНВАЛ, 5 сен — Sputnik, Козаты Диана. Фыццагкъласонтӕн ӕртыццӕджы, 5 сентябры, йӕ дуӕрттӕ ӕрбакодта Колыты Аксойы номыл Аивӕдты паддзахадон лицей.

Дыууӕ азы размӕ Лицей банысан кодта 25 азы юбилей. Уыцы рӕстӕгмӕ скъола рауагъта бирӕ ӕнтыстджын ӕмӕ курдиатджын сывӕллӕтты. Лицейы фыццаг къласмӕ абон бацыдысты 62 скъоладзауы. Актон залы ӕрӕмбырд сты сывӕллӕтты ныййарджытӕ ӕмӕ хиуӕттӕ, цӕмӕй балӕууой чысыл фыццагкъласонты фарсмӕ ахӕм ахсджиаг боны.

1 сентября в Лицее искусств
© Sputnik / Диана Козаева
Лицей сӕмбӕлд фыццагкъласонтыл

11-ӕм къласты ахуыргӕнинӕгтӕ сарӕзтой сывӕллӕттӕн ӕцӕг бӕрӕгбон зарджытӕ, кӕфтытӕ ӕмӕ лӕвӕрттимӕ.

Фыццагкъласонтӕн бӕрӕгбоны цытӕн раарфӕ кодта Лицейы директор Касойты Лаврентий, кӕцы къухдариуӕгад кӕны ахуыргӕнӕндонӕн йӕ фыццаг бонӕй фӕстӕмӕ.

"Мӕ цӕст уын уарзы фидар ӕнӕниздзинад. Хорз ӕнтыстытӕ уын ахуыры, ӕмӕ бирӕ тыхтӕ уӕ ныййарджытӕн. Сымах иумӕ хъуамӕ ацӕуат ацы 11 аз ӕмӕ суат Хуссар Ирыстоны аккаг ӕмбӕстӕгтӕ", — загъта уый.

Зонындзинӕдты бӕрӕгбоны, традицимӕ гӕсгӕ, ракафыдысты "Симд", кӕцы сӕххӕст кодта Быценты Геннадийы кафджыты скъола.

1 сентября в Лицее искусств
© Sputnik / Диана Козаева
Лицей райста йе скондмӕ 62 фыццагкъласоны

Бӕрӕгбонон линейкӕйы фӕстӕ хистӕркъласонтӕ бакодтой сывӕллӕтты сӕ кълӕстӕм, цы ран сом уыдон райдайдзысты ахуыр кӕнын.

Колыты Аксойы номыл Аивӕдты паддзахадон лицей арӕзт ӕрцыд 1991 азы. Уникалон ахуырадон уагдон реализаци кӕны программӕтӕ, афтӕ ма рӕзгӕ фӕлтӕрты хъомыл кӕныны хъуыддаджы скъуыддзаг кӕны культурон-рухсадон хӕстӕ.

Лицейы курдиатджын рауагъдонтӕ сты ӕнтыстджын скъолайы хорз ахуыргӕнджыты куысты фӕрцы. Лицейы рауагъдонты ӕхсӕн сты нывгӕнджытӕ, музыканттӕ, кафджытӕ, ӕхсӕнадон ӕмӕ политикон архайджытӕ.

19