Куыд банысан кӕндзысты Хуссар Иры Республикӕйы бон

Рафыссын
Бӕрӕгбонон мадзӕлттӕ цӕудзысты 25 сентябрмӕ, сӕ фылдӕр хай уыдзӕн Цхинвалы театралон фӕзуатыл

ЦХИНВАЛ, 13 сен — Sputnik, Козаты Диана. Хуссар Ирыстоны 28 хатт цӕудзысты бӕрӕгбонон мадзӕлттӕ, кӕцытӕ сты нывонд Республикӕйы бонӕн. Мадзӕлтты ӕхсӕн уыдзысты равдысттӕ, фестивальтӕ ӕмӕ конкурстӕ, спортивон мадзӕлттӕ ӕмӕ концерт. Сӕйраг цау традицимӕ гӕсгӕ уыдзӕн ӕфсӕддон парад столицӕйы сӕйраг фӕзуатыл.

День Республики - Sputnik Хуссар Ирыстон
Хуссар Ирыстоны Республикӕйы боны цытӕн уыдзӕн дӕргъвӕтин улӕфты бонтӕ

Автономон областы адæмон депутатты совет 1990 азы 20 сентябры расидт Советон демократон республикӕ Хуссар Ирыстон Советон Цæдисы сконды. Ацы уынаффæ ссис хæдбардзинад æмæ æхсæнадæмон нымадмæ фæндагыл фыццаг къахдзæфтæй иу. Уый фæстæ райдыдта дæргъвæтин тох хæдбардзинады сæрвæлтау, кæцы балхынцъ ис 2008 азы хæсты æмæ Хуссар Ирыстоны хæдбардзинад Уæрæсейы 'рдыгæй банымадæй.

"Бӕрӕгбонон мадзӕлттӕ райдайдзысты 19 сентябры Хетӕгкаты Къостайы цырты баконд ӕмӕ Дзауы поселочы Националон кады аллейы арӕзтад райдайынӕй. Уыцы бон республикӕты скъолаты ацӕудзӕн паддзахадон символты фӕдыл иугонд сахат ", — фехъусын кодтой хицауады пресс-службӕйы.

Бӕрӕгбоны бон — 20 сентябры — мадзӕлттӕ райдайдзысты Цхинвалы ӕфсӕддон парадӕй. Парад цӕудзӕн Хуссар Ирыстоны столицӕйы Театралон фӕзуатыл.

Уый фӕстӕ уым цӕудзӕн "Бӕгӕныйы бӕрӕгбон" — ирон бӕгӕныйы фӕндзӕм ӕхсӕнадӕмон фестиваль-конкурс.

"Афтӕ ма фӕзуатыл равдисдзысты "Нӕртон къуым" ӕмӕ ацӕудзысты спортивон мадзӕлттӕ ӕмӕ бӕрӕгбонон концерт. Хетӕгкаты Къостайы скверы байгом уыдзӕн аивадон равдыст "Сӕндидзӕн", — бафтыдтой пресс-службӕйы.

Уыцы бон бӕрӕгбон фӕуыдзӕн фейерверкӕй.

21 сентябры Хуссар Ирыстоны рӕстдинонтӕ нысан кӕндзысты Мад Майрӕмы бӕрӕгбон. Республикӕйы аргъуанты ацӕудзысты службӕтӕ.

Ноджы ма иу равдыст байгом уыдзӕн Цхинвалы 25 сентябры. Уый уыдзӕн нывонд Донецк ӕмӕ Луганскы адӕмон республикӕтӕн, Хуссар Ирыстонӕн ӕмӕ Абхазӕн. Равдыст уыдзӕн Анахарсисы номыл Республикон библиотекӕйы.

Ног хабӕртты лентӕ
0