ЦХИНВАЛ, 18 сен — Sputnik. Хуссар Ирыстоны хицауады сӕрдар Пухаты Эрик ауагъта кусӕгон рабадт, кӕцыйы рӕстӕджы банхъардта ӕфхӕрын ӕмгъуыд халӕг нардуатон организациты.
Пухаты Эрик банысан кодта, зӕгъгӕ, нардуатон организациты сӕргълӕуджыты, кӕцытӕ нӕ раттынц сӕ объект эксплуатацимӕ рӕстӕгыл, фӕивар кӕндзысты.
"Уый у ӕмуаг ӕфхӕрд куыстыты график халыны тыххӕй", — бахахх кодта хицауады сӕрдар.
Афтӕ ма рабадты рӕстӕджы республикӕйы хицауады уӕнгтӕ хыгъдлӕвӕрд радтой ныры куыстыты тыххӕй. Автомобилон фӕндӕгты эксплуатаци ӕмӕ арӕзтады комитеты сӕргълӕууӕг Гуыззыттаты Эдуард радзырдта ног сцалцӕггонд фӕндӕгтӕ ӕмӕ уынгты тыххӕй.
Арӕзтад, архитектурӕ ӕмӕ ЦКХ министры хӕстӕ ӕххӕстгӕнӕг Зӕгъойты Эдуард радзырдта Ленингоры поселочы газифтонгад, донифтонгад, канализаци ӕмӕ дыууӕ централон уынджы хӕрзарӕзтады тыххӕй.
Паддзахадон унитарон куыстуат "Водоканал"-ы генералон директор Цхуырбаты Алан хыгъд радта Ленингоры доны биологон сыгъдӕг кӕныны станцы эксплуатацийы фӕдыл. Йӕ ныхӕстӕм гӕсгӕ объект цӕттӕ у, хъӕуы ма дзы ӕрмӕст аскъуыддзаг кӕнын кӕцыдӕр техникон фарстытӕ.
Рабадты кӕрон хицауады уӕнгтӕ ӕрдзырдтой Дзауы районы ихуарды фӕстиуджытӕ аиуварс кӕныныл, кӕцы зиан ӕрхаста районы фӕллой ӕмӕ инфраструктурӕйӕн.
