Хицауады рабадт

Пухаты Эрик радзырдта Хуссар Ирыстоны арӕзтады тыххӕй

11
(ранӕуӕггонд 14:28 02.10.2018)
Хицауады сӕрдар ӕрсидт нардуатон организациты минӕвӕрттӕм, цӕмӕй сӕ хъус дарой арӕзтады гъӕдмӕ

ЦХИНВАЛ, 2 окт — Sputnik. Арӕзтады процессы архайӕг министрӕдтӕ ӕмӕ уагдӕттӕ хъуамӕ кусой куыд иунӕг механизм, ӕрмӕстдӕр уӕд уыдзӕн хорз фӕстиуджытӕ, загъта Хуссар Ирыстоны хицауады сӕрдар Пухаты Эрик 2018-2019 ӕзты Инвестпрограммӕйы реализацийы фӕдыл рабадты рӕстӕджы. Уый тыххӕй хъусын кӕны республикӕйы хицауады пресс-службӕ.

Рабадты хайад райстой арӕзтад, архитектурӕ ӕмӕ ЦКХ министры хӕстӕ ӕххӕстгӕнӕг Зӕгъойты Эдуард, йӕ хӕдивӕг Гаглойты Сергей, автомобилон фӕндӕгты арӕзтад ӕмӕ эксплуатацийы комитеты сӕргълӕууӕг Гуыззыттаты Эдуард, афтӕ нардуатон организациты сӕргълӕуджытӕ, кӕцытӕ хайад исынц Инвестпрограммӕйы объектты арӕзтады.

Хицауады сӕрдар ӕрсидт нардуатон организациты минӕвӕрттӕм, цӕмӕй сӕ хъус дарой арӕзтады процессы гъӕдмӕ, афтӕ ма рӕстӕгыл дӕттой документаци профилон министрӕдтӕ ӕмӕ уагдӕттӕм.

"Ахсджиаг у, цӕмӕй арӕзтады процессы министрадтӕ ӕмӕ уагдӕттӕ кусой куыд иунӕг механизм. Ӕрмӕст уӕд уыдзӕн хорз фӕстиуджытӕ", — банысан кодта Пухаты Эрик.

Автомобилон фӕндӕгты арӕзтад ӕмӕ эксплуатацийы комитеты сӕргълӕууӕг Гуыззыттаты Эдуарды ныхӕстӕм гӕсгӕ, куыстытӕ цӕуынц фидаргонд ӕмгъуыд ӕмӕ проектмӕ гӕсгӕ.

Афтӕ ма рабадты хайадисджытӕ ӕрдзырдтой республикӕйы районты электрохызӕгты модернизацийыл ӕмӕ Дзауы поселочы Хуссар Ирыстоны президенты резиденцимӕ бацӕуӕны гӕрӕнтӕ сӕвӕрыны фарстыл.

11