Плиты Нодар

Дзæуджыхъæуы нысан кæнынц номдзыд кафæг Плиты Нодары юбилей

50
(ранӕуӕггонд 12:32 12.10.2018)
Цæгат Ирыстоны адæмон артистæн раарфæ кæндзæн Хуссар Ирыстоны паддзахадон ансамбль "Симд" дæр

ЦХИНВАЛ, 12 окт — Sputnik, Плиты Фатимæ. Дзæуджыхъæуы цытджын уавæры банысан кæндзысты Цæгат Ирыстоны адæмон артист Плиты Нодары 70 азы юбилей. Ирыстоны ныры дуджы хуыздæр кафæгæн йæ райгуырæн боны фæдыл раарфæ кæнынмæ ацæудзæн Хуссар Ирыстоны кафт æмæ зарды паддзахадон ансамбль "Симд", фехъусын кодта Sputnik коллективы пресс-секретарь Гаглойты Кристина.

Цæгат Ирыстоны адæмон артист, Уæрæсейы сгуыхт артист, зынгæ кафæг æмæ хореограф Плиты Нодары юбилей арæзт цæуы Цæгат Ирыстоны паддзахадон университеты концертон залы.

"Абон цæуæм Плиты Нодары юбилеймæ. Коллектив раарфæ кæндзæн зындгонд кафæгæн дыууæ номырæй. Къорд сæххæст кæндзæн кафт симд æмæ хъаматимæ номыр равдисдзæн Коцты Григорий", — загъта Гаглойты Кристина.

Амæйразмæ номдзыд кафæджы юбилей банысан кодтой турчы ирæттæ дæр.

Ирон кафты аивадмæ Плиты Нодар фыццаг къахдзæфтæ акодта 1967 азы Хуссар Ирыстоны педагогон институты ахуыр кæныны рæстæджы. Уый, институты хæдархайгæ ансамблы кафгæйæ, йæхимæ æркæсын кодта сценæмæкæсджыты æмæ кафты аивады дæсныты. Фæстæдæр Хуссар Ирыстоны паддзахадон ансамбль "Симд"-мæ куы бацыд, уæд цыбыр рæстæгмæ ссис ансамблы хуыздæр кафджытæй иу. 1969 азы Нодар хуынд æрцыдис Цæгат Ирыстоны адæмон кафты ансамбль "Алан"-мæ. Йæ кармæ æнæксæгæйæ, Плиты Нодар абон дæр у ирон кафæджы дæнцæг.

Плиты Нодар райгуырдис 1948-æм азы 10 июлы Боржомы районы Сырххъæуы, у Уæрæсейы Федерацийы сгуыхт артист, Цæгат Ирыстон-Аланийы адæмон артист.

50