ЦХИНВАЛ, 1 ноя — Sputnik, Плиты Фатимæ. Хуссар Ирыстоны сæйраг сахары бавнæлдтой Стыр парчы хæрзарæзтадмæ — Леуахийы донбылгæроны иу хай, дыууæ хиды ʻхсæн сырæздзæн аив улæфæн зонæ. Уый тыххæй Sputnik фехъусын кодтой Арæзтады министрады пресс-службæйы.
"Ныридæгæн сыгъдæг цæуы Стыр парчы территори. Ам 2008 азы хæсты æхстыты рæстæджы цы бæлæстæ бахъыгдард сты, уыдон бынаты ногæй ныссадздзысты 200 талайы. Тæккæ донбылгæрæтты фæзындзæн велофæндаг", — загъта уагдоны пресс-секретарь Тедеты Алена.
Арæзтады министрады минæвары ныхæстæм гæсгæ, ам куыстытæ балхынцъ уыдзысты 2019 азы астæу.
"Парчы мидæг ма уыдзæн сценæ, хиирхæфсæн аттракционтæ. Раздæрау ма дзы фæзындзæн ауæзтæ æмæ сæ сæрыл хидтæ. Иудзырдæй, уыдзæн тынг аив", — бафтыдта министрады пресс-секретарь.
Стыр парчы хæрзарæзт цæуы 20 мин квадратон метрыл. Инвестпрограммæмæ гæсгæ йын рахицæн æрцыд 33,5 милуан сомы.
