Sputnik Хуссар Ирыстон

Цхинвал фехъуыста: радио Sputnik Хуссар Ирыстон рахызт комкоммӕ эфирмӕ

8
(ранӕуӕггонд 13:43 03.12.2018)
Sputnik райдыдта радиофидиуӕн FM-диапазоны ирон ӕмӕ уырыссаг ӕвзӕгтыл 2016 азы ноябры, дыууӕ азы фӕстӕ амонджытӕ фыццаг хатт ӕрныхас кодтой уазджытимӕ комкоммӕ эфиры

ЦХИНВАЛ, 3 дек ­– Sputnik, Козаты Диана. Радио Sputnik Хуссар Ирыстон къуырисӕры, 3 декабры, рахызт комкоммӕ эфирмӕ. Ног форматы фыццаг уазджытӕ уыдысты Уӕрӕсейы минӕвар Хуссар Ирыстоны Марат Кулахметов ӕмӕ Мыхуыр ӕмӕ информацийы комитеты сӕргълӕууӕг Хъотайты Мария.

Радио Sputnik райдыдта радиофидиуӕн  FM-диапазоны ирон ӕмӕ уырыссаг ӕвзӕгтыл 2016 азы ноябры, дыууӕ азы фӕстӕ амонджытӕ фыццаг хатт ӕрныхас кодтой уазджытимӕ комкоммӕ эфиры.

Агентады пресс-центры ацыд пресс-конференци, кӕцы уыд нывонд ацы цауӕн. Уазджытӕн равдыстой видео, кӕцы бацӕттӕ кодта агентады сфӕлдыстадон къорд ацы бонмӕ.

Цхинвал фехъуыста радио

Sputnik Хуссар Ирыстоны сӕргълӕууӕг Виталий Раднаев радзырдта радиойы райрӕзты нывӕзтытыл.

"Цхинвал нӕ фехъуыста комкоммӕ эфиры. Уый махӕн у стыр цау, кӕцымӕ мах бирӕ рӕстӕг цыдыстӕм", - загъта уый.

Раднаев банысан кодта, зӕгъгӕ, агентад уӕрӕх кӕндзӕн йӕ радиофидиуӕн, аххӕсдзӕн Ленингоры районыл дӕр.

Йӕ ныхӕстӕм гӕсгӕ, радиофидиуӕн уагъд цӕудзӕн дыууӕ паддзахадон ӕвзагыл – уырыссыг ӕмӕ ирон.

"Радио Sputnik Хуссар Ирыстон, сӕйраджыдӕр, кусы интернеты. Фӕлӕ махмӕ ис зӕронд формат дӕр - FM диапазон. Махӕн ис стыр аудитори ӕмӕ йӕ мах уӕрӕх кӕндзыстӕм", - загъта Виталий Раднаев.

Радиойы райрӕзт – пайдаджын конкуренци

Sputnik агентадӕн раарфӕ кодта мыхуыр ӕмӕ информацийы комитеты сӕргълӕууӕг Хъотайты Мария.

"Арфӕ уын кӕнын. Уӕ бӕллиц сӕххӕст ис – сымах фыццаг бон стут комкоммӕ эфиры. Мӕн уырны, радио кӕй уыдзӕн актуалон ӕмӕ кӕй ссардзӕн йӕхи аудитори", - загъта комитеты сӕргълӕууӕг.

Уый ма бафтыдта, зӕгъгӕ, Хуссар Ирыстоны кӕй кусы ӕрмӕст дӕр иу паддзахадон радиостанц ӕмӕ ацы информацион фӕрӕзы райрӕзт республикӕйы ратдзӕн пайдаджын  конкуренци.

Хъӕуы рӕзын

Радио Sputnik рахызт комкоммӕ эфирмӕ у стыр ӕнтыст ӕмӕ бӕрн, загъта уӕрӕсейаг минӕвар Марат Кулахметов.

Уый бахахх кодта, ног форматмӕ рахызт кӕй радта бирӕ фадаттӕ, фӕлӕ коллективӕн нырӕй фӕстӕмӕ хъӕудзӕн фылдӕр ахуыр кӕнын фарсттӕ, кӕцытыл ныхас кӕндзысты комкоммӕ эфиры.

8