Цхинвалы ацыд профессор Медойты Боболкайы мысæн изæр

Уæздан сылгоймаг: Цхинвалы ацыд профессор Медойты Боболкайы мысæн изæр

118
(ранӕуӕггонд 17:59 21.12.2018)
Æрæмбырдуæвджытæ æрдзыдтой профессорæн йæ хайбавæрдыл ирон æвзаджы райрæзтмæ, ахуыргæнæджы куыстыл æмæ æнахуыр уæздандзинад æмæ фæлмæн ахастыл

ЦХИНВАЛ, 21 дек — Sputnik, Плиты Фатимæ. Хуссар Ирыстоны паддзахадон университеты банысан кодтой профессор, ХИПУ-йы ирон кафедрайы сæргълæууæг Медойты Боболкайы райгуырдыл 90 азы сæххæсты бон. Мысæн изæрмæ æрбацыдысты республикæйы разамынад, паддзахадон университеты æмæ скъолаты ахуыргæнджытæ, ахуыргондæн йæ зæнæг — Гæбулты Вадим æмæ Индира.

Æрæмбырдуæвджытæ æрдзыдтой профессорæн йæ хайбавæрдыл ирон æвзаджы райрæзтмæ, ахуыргæнæджы куыстыл æмæ æнахуыр уæздандзинад æмæ фæлмæн ахастыл.

Мадзалы райдайæны равдыстой "ЮОГУ-ТВ"-йы бацæттæгонд видеоæрмæг профессоры интервьютæ æмæ кадртимæ. Залы сæвæрдтой дыууæ стенд йæ нывтæ æмæ чингуытимæ.

"Медойты Боболка уыд фидауынгæнæг æмæ диссаджы сылгоймаг. Бирæ сарæзта ирон æвзаджы пропагандæ æмæ ирон журналисткæйы размæцыдæн. Абон дæр махæн уый тынг нæ фаг кæны", — загъта ректор Тедеты Впадим йæ раныхасы.

Уый ма баныфсæвæрдта, ХИПУ-йы музейы кæй рахицæн кæндзысты сæрмагонд бынат Медойты Боболкайæн. Мысæн изæры йæ фембæлдтæ зындгонд ахуыргондимæ æрæмысыд президент Бибылты Анатолий дæр.

"Арæх-иу фембæлдыстæм Боболкаимæ. Алы хъуыддаджы дæр йæм уыд уæздандзинад, фæлмæндзинад æмæ та йæм экранмæ кæсгæйæ дæр банкъардтам йæ фæлмæн ахаст. Адæймаг цæры, цалынмæ йæ хъуыды кæнынц, уæдмæ. Æвæццæгæн, Боболка нын цæрдзæн æнустæм", — загъта паддзахады разамонæг Бибылты Анатолий.

Ирон литературæйы профессор Плиты Гацыр йæ мысинæгтæ дзургæйæ бахатыд, Республикæ æмæ ХИПУ-йы разамынадмæ, цæмæй бацархайой Медойты Боболкайы куыстытæ иумæйаг æмбырдгондæй рауадзыныл.

"Медойты Боболкайы куыстытæ иумæйаг æмбырдгондæй хъæуы рауадзын, уыдон æнæмæнхъæуæг сты студенттæн хуссары дæр æмæ цæгаты дæр. Ахæм уавæры сты Мамиты Гига, Цхуырбаты Лиза æмæ æндæрты куыстытæ дæр", — загъта Плиты Гацыр.

Медойты Боболкайы зонадон куыстытæ æмæ цардвæндагыл æрдзырдта филологон зонæдты кандидат, доцент Дзиццойты Юрий.

Медойты Боболкайы райгуырд 1928 азы Уелиты хъæуы, каст фæцис Сталиниры педагогон институт, 1979 азы слæууыд ирон æвзаг æмæ литературæйы кафедрæйы сæргъ, лæвæрд йын æрцыд профессоры ном. Профессор йæ цардæй ахицæн цыппар азы рамæ. Уый бауарзын кодта мадæлон æвзаг дæсгай æмæ сæдæгай студенттæн, рацыд ын цалдæр чиныджы ирон æвзагзонынадæй.

118
Цхинвал

Хуссар Иры ӕнӕкусӕгон бонтӕ нӕ адарддӕр кӕндзысты

2
(ранӕуӕггонд 16:08 28.05.2020)
Июны кӕрӕттӕм баззайдзысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм

ЦХИНВАЛ, 28 мая – Sputnik, Козаты Диана. Хуссар Ирыстоны ӕнӕкусӕгон бонтӕ, кӕцытӕ расидтысты коронавирусы пандемийы тасӕй, нӕ адарддӕр кӕндзысты, загъта Sputnik президенты пресс-секретарь Гасситы Дина.

Хуссар Ирыстоны ӕнӕкусӕгон бонтӕ расидтысты 8 апрелы, уый фӕстӕ сӕ дыууӕ хатт адарддӕр кодтой 11 ӕмӕ 28 майы онг.

"Райсгӕ мадзӕлтты руаджы фӕкъаддӕр ис коронавирусы апарахаты тас. Инфекци нӕ рахызт медицинон уагдӕттӕй, цы ран сизоляци кодтой ӕмбӕстӕгты карантины. Уавӕр ис хъусдарды бын. Уый фӕдыл ӕнӕкусӕгон бонтӕ нӕ адарддӕр кодтой", - загъта Гасситы Дина.

Фӕлӕ баззадысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм. Куыстӕй ссӕрибар кодтой ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Афтӕ ма бар ис ссӕрибар кӕнын ныййарджытӕй иуы, кӕцы зилы 10 азы кары онг сывӕллонмӕ.

2
Ветеран

Хуссар Иры фӕмардуӕвӕг ветеранты бинонтӕн бакӕндзысты финансон ӕххуыс

2
(ранӕуӕггонд 14:15 28.05.2020)
Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны, уыдонӕй дыууӕ амардысты Уӕлахизы боны

ЦХИНВАЛ, 28 май – Sputnik, Козаты Диана. Хуссар Ирыстоны хицауады резервон фондӕй хицӕн ӕрцыдысты ӕхцайы фӕрӕзтӕ, ацы аз цы Стыр Фыдыбӕстон хӕсты ветерантӕ амардысты, уыдон бинонтӕн баххуыс кӕныны нысанӕн.

Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны – Кокойты Григорий, Джергаты Василий ӕмӕ Арболишвили Александр. Джергаты Василий йӕ 100-азон юбилеймӕ нӕ фӕцард цалдӕр мӕйы. Ноджы ма иу хӕстон архӕйдтыты хайадисӕг Хуссар Ирыстонӕй йӕ цардӕй ахицӕн ис Санкт-Петербурджы, йӕ мӕрдон буар ын фӕстӕдӕр ӕрластой йӕ райгуырӕн бӕстӕмӕ.

"Мах хъынцъым кӕнӕм уыцы адӕмы амӕлӕты тыххӕй, кӕцытӕ хъӕбатырӕй равдыстой сӕхи Стыр Фыдыбӕстон хӕсты быдырты. Стыр хъыгагӕн, азӕй-азмӕ уыдон кӕнынц къаддӕрӕй-къаддӕр. Майы не ‘хсӕнӕй фӕхъуыд ӕртӕ ветераны. Фӕлӕ мах сараздзыстӕм алцыдӕр, цӕмӕй сӕ ном рох макуы уа", - загъта хицауады сӕргълӕууӕг Пухаты Эрик.

 Дзӕнӕттаг ветеранты бинонтӕн ӕххуысы хуызы рахицӕн кӕндзысты фӕйнӕ сӕдӕ мин сомы.

2