ЦХИНВАЛ, 16 янв – Sputnik. Хуссар Ирыстоны президент Бибылты Анатолий бахæс кодта фæкъаддæр кæнын æртаджы æргътæ. Фарстыл уынаффæ цыд вице-премьер – экономикæйы министр Бекъойты Геннадиимæ фембæлды рæстæджы.
Ныридæгæн паддзахадон амалиуæгад "Югосетнефтепродукт"-ы æртагкæнæн станцты АИ-92 маркæйы бензин уæй цæуы 38 сомыл, дизелон æртаг - 46 сомы
"Ӕз нымайын, æргътæ сты æгæр бæрзонд. Кæд махмæ ис æртаджы æргътæ чи нывыл кæны ахæм уагдон "Югосетнефтепродукт", уæд уый хъуамæ тагъд архайа æддагон æргъты ивындзинæдты рæстæджы", - радæтта президенты ныхæстæ йæ пресс-службæ.
Бибылты Анатолий банхъардта бакусын æртаджы аргъы фарстыл фæсарæнты æргътæ хынцгæйæ.
"Бензины аргъ хъуамæ ма хиза 35 сомæй æмæ дизелон æртаг та 43 сомæй. Мæн фæндит, цæмæй æргътæ æмбæлон уагмæ æркæнат 1 февральмæ, кæцытæ уыдзысты фæсарæнты аргъты æнгæс", - загъта президент.
Паддзахады разамонæг бафтыдта, ахæм мадзæлттæ хъæуы райсын электроэнергийы æргъты фæдыл дæр, цæмæй амалиуæггæнджытæн хуыздæр уавæртæ арæзт æрцæуой кусынæн.
"Электроэнергийы æргътæ фæкъаддæр кæнын хъæуы 25-30 копеччы бæрц, уый хорзырдæм бандавдзæн амалиуæггæнджыты куыстыл", – загъта Бибылты Анатолий.
Вице-премьер баныфсæвæрдта, президенты хæслæвæрдтæ æххæст цæудзысты.
"Бакусдзыстæм æртаджы аргъ 1 февральмæ фæкъаддæр кæныныл. Электроэнергимæ цы хауы, кæй зæгъын æй хъæуы, амалиуæггæнджытæн хъæуы æххуыс кæнын", - загъта Бекъойты Геннадий.
