ЦХИНВАЛ, 2 апр – Sputnik, Козаты Диана. Хуссар Ирыстоны парламентмӕ ӕвзӕрстыты ног системӕ бандавдзӕн ӕвзарджыты фӕзындыл 9 июны, фехъусын кодта закондӕттӕг органы спикер Гасситы Петр.
Радон парламентон æвзæрстытæ ацæудзысты 9 июны ног системӕмӕ гӕсгӕ: 34 депутатæн се 'мбис æвзæрст æрцæудзæн партион номхыгъдтæм гæсгæ, аннæ æрдæг та - иумандатон зылдтæм.
"Кӕй зӕгъын ӕй хъӕуы, мажоритариты хайадист фӕфылдӕр кӕндзӕн интерес ӕвзӕрстытӕм. Алкӕй хӕс дӕр у ӕрбацӕуын ӕвзӕрстытӕм ӕмӕ схъӕлӕс кӕнын. Ацы хъуыддаджы бирӕ баст уыдзӕн ДИФ-тыл, кӕцытӕ хъуамӕ ӕрсидой ӕмбӕстӕгтӕм сӕххӕст кӕнын сӕ конституцион хӕс", - загъта Гасситы Петр.
Спикер банысан кодта, Хуссар Ирыстоны бирӕ зындӕр кӕй у уадзын ӕвзӕрстытӕ ӕндӕр бӕстӕтӕм абаргӕйӕ.
"Фыццаджыдӕр, нӕ республикӕйы иууылдӕр кӕрӕдзи зонынц. Афтӕ ма махмӕ ис мыггагон системӕ, адӕм ӕвзарынц сӕ "ӕмбал", кӕнӕ та сӕ "хӕстӕг"-ы", - загъта спикер.
Гасситы Петр бафтыдта, зӕгъгӕ, ӕвзӕрстытӕ ацыдаиккой бирӕ хуыздӕр, ацы системӕйыл куы фӕтых уыдаиккой, уӕд.
