Цхинвалы басгӕрстой ӕртаджы станцты куыст

© Sputnik / Ада БагианЦхинвалы басгӕрстой ӕртаджы станцты куыст
Цхинвалы басгӕрстой ӕртаджы станцты куыст - Sputnik Хуссар Ирыстон
Рафыссын
Басгӕрст ауагътой стандартизацийы комитет ӕмӕ прокуратурӕйы кусджытӕ. Уыдон сӕрмагонд "барӕнӕй" басгӕрстой фараст ӕртаджы станц Хуссар Ирыстоны столицӕйы

ЦХИНВАЛ, 4 апр – Sputnik, Козаты Диана. Хуссар Ирыстоны стандартизаци ӕмӕ метрологийы комитет ауагъта рейд столицӕйы ӕртаджы станцты. Прокуратурӕйы кусджытимӕ иумӕ уыдон басгӕрстой горӕты ӕртаджы станцтӕ бензин кӕронмӕ кӕныны фӕдыл.

Сӕйраг метролог Цхуырбаты Зауыры ныхӕстӕм гӕсгӕ, уый уыд прокуророн басгӕрст, кӕцыйы хайад райстой стандартизацийы кусджытӕ дӕр. Ӕртаджы станцты хицӕуттӕн развӕлгъау нӕ фехъусын кодтой басгӕрсты тыххӕй.

"Мах басгӕрстам фараст ӕртаджы станц Цхинвалы. Фехӕлдтӕ рабӕрӕг кодтам ӕрмӕст дӕр иуы, цы ран 10 литр ӕртагӕй 200 грамм нӕ ныккодтой. Ӕртаджы станцы хицау хъуамӕ дӕс бонмӕ аиуварс кӕна фехӕлдтӕ", - загъта Цхуырбаты Зауыр.

Уый ма бнысан кодта, ӕртаджы станцы хицау ӕмгъуыдмӕ куы нӕ аиуварс кӕна фехӕлдтӕ, уӕд ӕй фӕивар кӕндзысты.

 Роснефть - Sputnik Хуссар Ирыстон
Цхинвалы райдыдтой аразын "Роснефть"-ы ӕртаджы станц

Цхуырбаты Зауыр радзырдта, законмӕ гӕсгӕ стандартизацийы комитет аз иу хатт уадзы басгӕрст ӕртаджы станцты.

"Арӕхдӕр уадзын ахӕм мадзӕлттӕ махӕн бар нӕй. Фӕлӕ нӕм фӕлхасгӕнджытӕй хъаст куы ӕрбацӕуа, уӕд нын бар ис басгарын ӕртаджы станц", - банысан кодта Цхуырбаты Зауыр.

Сӕйраг метролог бафтыдта, зӕгъгӕ, фӕстаг рӕстӕджы хъастыты нымӕц фӕкъаддӕр ис, уый тыххӕй ӕмӕ уагдон балхӕдта ӕнӕмӕнгхъӕугӕ ифтонггарз ӕмӕ амалиуӕггӕнджытӕ уый фӕдыл аиуварс кодтой сӕ куысты фиппаинӕгтӕ.

Ног хабӕртты лентӕ
0