ЦХИНВАЛ, 30 апр - Sputnik, Плиты Фатимӕ. Цӕгат Ирыстоны Паддзахадон хӕххон аграрон университеты адӕмон кафты сгуыхт ансамбль "Горец" ратдзӕн концерт Цхинвалы 7 майы. Кафты номдзыд ансамбль ӕрфысым кӕндзӕн Хуссар Иры Паддзахадон драмон театр, фехъусын кодтой Sputnik уагдоны пресс-службӕйы.
Концерты архайдзӕн кафджыты къорд ӕмӕ оркестр.
"Сфӕлдыстадон къорд адӕмы размӕ рахӕсдзӕн 15 номыры бӕрц, сӕ нымӕцы кӕфтытӕ ӕмӕ зарджытӕ. Кӕсӕг уазӕг ансамблы сӕххӕстӕй фендзӕн ирон хореографи фидыц кафт симд, стӕй ма хъаматимӕ кафт, сиргӕ, хӕххон, хонгӕ, ирон вальс ӕмӕ ӕндӕртӕ", - загътой пресс-службӕйы.
Ансамблӕн ис хъӕзныг гастролон географи, сфӕлдыстадон къорд йӕ арӕхстдзинад хицӕн ӕзты ӕвдыста Франц, Итали, Испани, Куба, Инди, Советон цӕдисы республикӕты. 1962 азӕй фӕстӕмӕ бабӕрӕг кодта 30 бӕстӕйы бӕрц.
Ансамбль "Горец" сарӕзтӕуыд 1961 азы, йӕ сконды сты Паддзахадон хӕххон аграрон университеты студенттӕ. Къорды аивадон разамонӕг у Цӕгат Ирыстоны адӕмон артист Ӕлборты Юрий.
