ЦХИНВАЛ, 27 июн - Sputnik, Плиты Фатимæ. Галаты Борисы номыл Хуссар Ирыстоны кафт æмæ зарды паддзахадон ансамбль "Симд" фыццаг хатт ралæудзæн Паддзахадон драмон театры сценæйыл хисæрмагонд концертимæ.
Бæстæйы сæйраг ансамбль адæмы размæ рахæсдзæн ирон хореографийы бындурон номыртæ – симд, хонгæ, сиргæ, хъаматимæ кафт æмæ æндæртæ. Изæры фидыц суыдзæн хореографион равдыст "Алантæ", фехъусын кодта Sputnik "Симд"-ы сæйраг администратор Гаглойты Кристина.
"Паддзахадон ансамбль "Симд" фыццаг хатт ралæудзæн ацы аз хисæрмагонд концертимæ, стæй ма фыццаг хатт уыдзыстæм ногарæзт театры сценæйыл. Коллектив бацæттæ кæндзæн 7 кафты номыры. Уымæй дарддæр ма изæры ралæудзæн оркестр æмæ ансамблы хор, йæ репертуары уыдзæн ног зарджытæ дæр", - загъта Гаглойты Кристина.
Концерт ацæудзæн фæндзæм июлы Цхинвалы, 18:30 сахатыл.
Уымæй дарддæр ма Цхинвалы йæ арæхстдзинад равдисдзæн Цæгат Ирыстоны сæйраг ансамбль – "Алан" дæр.
