ЦХИНВАЛ, 29 июл — Sputnik, Плиты Фатимæ. Хуссар Ирыстоны авторон зарæджы клуб "Струны Алании" хоны фыццаг Ӕхсæнадæмон авторон (бардон) зарæджы фестиваль "Струны Аланской Души"-йы хайадистмæ. Мадзал цæудзæн 15–æй 19 августмæ Дзауы районы Цъоны уæвæг цады былгæрон, хъусын кæны клубы сайт.
Фестиваль уадзы клубы сæрдар Колесникова Лейла Хуссар Иры президенты æмархайдæй.
"Хуссар Ирыстон у уазæгуарзаг бæстæ, ис ын алæмæттаг æрдз, хъæзныг культурæ æмæ æгъдæуттæ. Ӕхсызгон нын уыдзæн равдисын нæ бæстæйы фендтаг бынæттæ", - дзырдæуы хъусинаджы.
Жюрийы сконды сты горæт Цхинвалы культурæйы управленийы хистæр Игорь Тасо (Тасойты), сфæлдыстадон кусджытæ Евгений Лихачев Мæскуыйæ, Джавид Имамвердиев Бакуйæ, Виктор Глазкин Константиновскæй, Марат Фахртдинов Мæскуыйæ.
Конкурсы хатдзæгтæм гæсгæ, уæлахиздзаутæ райсдзысты "Лауреат" æмæ "Дипломант"-ы ном, уыдзæн ма дзы Гран-при æмæ кæсджыты хъуыдымæ гæсгæ уæлахиздзау.
