ЦХИНВАЛ, 9 авг - Sputnik, Дриаты Лейла. Цæгат Ирыстоны сæргълæууæг Битарты Вячеслав æмæ Хуссар Ирыстоны Президент Бибылты Анатолий фембæлдысты Уналы этнолагерь "Аланты фæд"-ы архайджытимæ.
Дыууæ республикæйы разамонджытæ бæстон дзуæппытæ лæвæрдтой лагеры архайджыты фæрстытæн. Уымæй дарддæр ма сын фехъусын кодтой сæхи фæнд дæр. Ома иумæйаг стратегийыл бакусын, цæмæй æппынæдзухдæр мадæлон æвзаджы рæзтыл куыст цæуа, уый тыххæй. Уæвгæ та лагеры архайджыты хъуыды у иу - ирон æгъдæуттæ æмæ традицитæ сног кæнын. Фæстæдæр Бибылты Анатолий æмæ Битарты Вячеслав сæ къухтæ æрæвæрдтой, æрæджы кæй сног кодтой, уыцы Цæллагты мæсыджы сæйраг къулдуарыл. Уыцы бонæй, зæгъæн ис, æмæ райдыдта ирон адæмы ног истори.
Этнолагерь кусы 5-æм аз. 10 бонмæ сæ базонгæ кодтой Ирыстоны истори æмæ культурæимæ. Хайадисджытӕ Ирыстоны арвыстой цымыдисон рӕстӕг. Экскурситӕ, культурон ӕмӕ хиирхӕфсӕн мадзӕлттӕ.
Дунейы алы бæстæты минæвæрттæ æппæты фыццаг бабæрæг кодтой Ирыстоны хуыздæр бынæттæ. Ирæн ис хъæздыг истори æмæ йæ базонын алкæмæн дæр уыд цымыдисон. Форумы архайджытæй быннæттон цæрджытæй фехъуыстой рагон таурæгътæ æмæ кадджытæ, алыгъуызон цаутæ. Уыцы иу рæстæг сæ къамтæ исынмæ дæр зивæг нæ кодтой. Уæвгæ ма кæм сæмбæлдзысты æхæм æвидигæ æрдзон рæсугъддзинæдтыл.
Сæхæдæг куыд зæгъынц, сæ хæдзæрттыл куы сæмбæлой, уæд сæм бирæтæ хæлæг дæр кæндзысты, Аланты зæхх кæй бабæрæг кодтой, уый тыххæй. Сæ фылдæр Ирыстоны фыццаг хатт уыдысты. Йæ кой йын хъуыстой, йæ зындгонд минæвæртты тыххæй зонынц, фæлæ йæ хи цæстæй федтой фыццаг хатт.
Уналы фембæлды фæстæ фæсивæд араст сты Хуссар Ирыстонмæ.
Уыдон æрбацыдысты æдзард хæстонты ном æрымысынмæ, ссардтой сын сæ рухс нӕмттӕ - ссыгътой цырӕгътӕ.
Парламенты асинты цур ацы хатт дæр равæрдтой, гуырдзиаг агрессорты къухтæй чи фæмард 2008 азы хӕсты, уыдоны къамтæ. Фыдохы мадзалмæ æрбацыд минмæ хæстæг адæм. Афтæ ма сын сорганизаци кодтой экскурситæ республикæйы Дзауы районмæ.
