Алексей Ковалев

Къамисæг Алексей Ковалев: фотоконкурс бакодта ног нæмттæ

40
(ранӕуӕггонд 11:07 20.08.2019)
Фотоконкурс "Хуссар Ирыстон —2019"-ы жюрийы сæрдар рахицæн кодта Тедеты Анжела æмæ Хетæгкаты Русланы куыстытæ

ЦХИНВАЛ, 20 авг — Sputnik, Плиты Фатимæ. Ӕппæтреспубликон æрвылазон фотоконкурс "Хуссар Ирыстон—2019" бакодта дыууæ ног къамисæджы нæмттæ, фæлæ конкурсы æмвæзад ацы аз уыд лæмæгъдæр, загъта Sputnik жюрийы сæрдар, фотограф Алексей Ковалев.

Культурæйы министрады адæмон сфæлдыстады центр ивгъуыд къуыри хатдзæгтæ скодта фæндзæм æппæтреспубликон æрвылазон фотоконкурс "Хуссар Ирыстон —2019"-æн. Ӕртæ номинацийы сæрмагонд къамис равзæрста хуыздæр хæдахуыр къамисджыты.

"Ивгъуыд азы куыстытæ уыдысты цымыдисондæр. Бахынцын хъæуы æмæ ацы аз се ʻхсæн нал уыд ацы конкурсты æдзух архайæг, дзæнæттаг фотограф Гæбæраты Нелли. Ӕз мæхицæн къамисæджы дæсныйады бакодтон дыууæ ног адæймаджы – мæ зæрдæ мын балхæдтой Тедеты Анжела æмæ Хетæгкаты Руслан", - загъта Алесей Ковалев.

Конкурсы уыд æртæ номинацийы – "Хуссар Иры цæсгæмттæ", "Хуссар Иры фендтаг бынæттæ" æмæ "Цхинвал абон".

Тедеты Анжела уæлахиздзау ссис дыууæ номинацийы, Хетæгкаты Руслан та расгуыхт "Цхинвал абон"-ы номинацийы. Конкурсы ма æнтыстджын уыдысты Мæргъиты Ирбег, Туаты Мария, Бестауты Лариса, Авагимова Элла, Джаджиты Аланæ, Джиоты Алена æмæ Уалыты Мальвина. Фæндзæм конкурсмæ бавдыстой 16 авторы 88 куысты

Къамтæн аргъгæнæг уыдысты фотограф Алексей Ковалев- жюрийы сæрдар, Нывгæнджыты цæдисы сæрдар Цхуырбаты Тамерлан, Культурайы министры хæдивæг Дзеранты Джульетта æмæ йе ʻмкусæг Цхуырбаты Ариана.

40