ХИПУ

ХИПУ ректор радзырдта иууыл популярондӕр дӕсниӕдты тыххӕй

5
(ранӕуӕггонд 13:57 20.08.2019)
Абитуриентты приоритеттӕ фӕстаг ӕзты тынг нӕ фӕивтой, фӕлӕ кӕцыдӕр дӕсниӕдтӕ ссисты популярондӕр, банысан кодта Тедеты Вадим. Уый тыххӕй ректор радзырдта пресс-конференцийыл Sputnik-ы

ЦХИНВАЛ, 20 авг – Sputnik, Козаты Диана. Хуссар Ирыстоны паддзахадон университеты (ХИПУ) иууыл популярондӕр дӕсниад нырма дӕр у юридикон факультет. Раздзог бынӕттыл ма сты истори ӕмӕ ӕхсӕнадӕмон ахастыты факультеттӕ, загъта Sputnik пресс-конференцийыл Хуссар Ирыстоны ахуыргӕнӕндоны ректор Тедеты Вадим.

ХИПУ-йы дыууӕ мӕйы архайды фӕстӕ йӕ куыст балхынцъ кодта исӕн къамис, кӕцыйы фӕстиуджыты тыххӕй журналисттӕн радзырдта Тедеты Вадим. Йӕ ныхӕстӕм гӕсгӕ экзаментӕ райдыдтой 15 июлы ӕмӕ мӕйы кӕрӕттӕм боны дӕсниӕдтӕм райст фӕцис.

Ректор банысан кодта, абитуриентты приоритеттӕ фӕстаг ӕзты тынг кӕй нӕ фӕивтой ӕмӕ иууыл популярондӕр нырма дӕр у юридикон факультет. Тедеты Вадим бахахх кодта, зӕгъгӕ, уый бирӕты зӕрдӕмӕй нӕ цӕуы, фӕлӕ цалынмӕ ис абитуриенттӕ, кӕцытӕ равзӕрстой ацы здӕхт, уӕдмӕ ахуырӕгӕндонӕн нӕй гӕнӕн ӕруромын райст ацы факультетмӕ.

Вадим Тедеев
© Sputnik / Наталья Айриян
Тедеты Вадим

Тедеты Вадим ӕрхаста истори ӕмӕ практикон математикӕйы факультетты цӕвиттон, кӕцытӕ ссисты популярон фӕстаг ӕртӕ азы.

"Афтӕ нал уыд фӕстаг 10-15 азы. Ацы аз истори уыд ӕртыккаг бынатыл, фӕлӕ ныр дӕр уынӕм ацы педагогикон дӕсниады популярондзинад. Ацы фадыджы уагъд цӕуы стыр куыст деканат ӕмӕ историкты рдыгӕй. Фидӕны историктӕ сӕхӕдӕг райдыдтой ӕмбарын, нӕ бон куы нӕ уа сбӕлвырд кӕнын зонадон тезистӕ, уӕд мах фесафдзыстӕм нӕ истори. Уый фӕдыл фӕсивӕд зӕрдиагӕй райдыдтой ахуыр кӕнын истори", - загъта ХИПУ ректор.

Уый ма радзырдта, ахуыргӕнӕндон кӕй фӕхуыздӕр кодта математикӕйы фадыджы уавӕр ӕмӕ бахастой ацы дӕсниадмӕ информатикӕ дӕр.

Тедеты Вадим йӕ цӕст ӕрдардта дӕсниад "Ӕхсӕнадӕмон журналистикӕ"-мӕ дӕр. Йӕ ныхӕстӕм гӕсгӕ, кӕд ӕмӕ уый нӕ хауы иууыл популярондӕр факультетты номхыгъдмӕ, уӕддӕр ахсы фыццаг бынат рауагъдонты куысты бынӕттӕй сифтонг кӕнынӕй.

Пресс-конференция в Sputnik ректора ЮОГУ Вадима Тедеева
© Sputnik / Наталья Айриян
Тедеты Вадим

Цымыдисон дӕсниадыл ма ректор банымадта медицинон бихоми, кӕцы райдыдтой исын фарон. Тедеты Вадим бамбарын кодта, раздӕр ацы дӕсниад кӕй хуынд "Хими ӕмӕ биологи", рауагъдонтӕн та сӕ бон уыд кусын куыд ахуыргӕнджытӕй, афтӕ дохыртӕ-лаборанттӕй дӕр.

"Ацы категорийы рауагъдонтӕ кусдзысты дохыртӕ-лаборанттӕй. Уый фӕдыл ректорат банхъардта баивын "Хими ӕмӕ биологи" ном "Медицинон бихоми"-йыл. Ныр ацы факультеты рауагъдонтӕн уыдзӕн фадат кусын куыд ахуыргӕнджытӕй, афтӕ дохыртӕ-лаборанттӕй дӕр ӕнӕ уӕлӕмхасӕн ахуырадӕй", - радзырдта ректор.

Уый бафтыдта, зӕгъгӕ ахӕм къахдзӕфты руаджы фӕфылдӕр абитуриентты нымӕц ацы факультетмӕ.

Уымӕй дарддӕр ма ректор радзырдта медицинӕйы фадыджы ӕндӕр здӕхтты баконды тыххӕй ӕмӕ банысан кодта, уый тыххӕй сын кӕй нӕй ӕнӕмӕнгхъӕугӕ базӕ ӕмӕ уый фӕдыл ӕндӕр дӕсниӕдты гъӕдджын ахуырад Хуссар Ирыстоны рауагъдонтӕ райсынц уӕрӕсейаг ахуыргӕнӕндӕтты.

5