ХИПУ

Процесс ацыд: ХИПУ ректор радзырдта, куыд тох кӕнынц ахуыргӕнӕндоны коррупциимӕ

5
(ранӕуӕггонд 14:36 20.08.2019)
Ахуыргӕнӕндоны исӕн къамисӕн уыд хӕслӕвӕрд аиуварс кӕнын коррупци экзаменты рӕстӕджы, банысан кодта Тедеты Вадим. Уый тыххӕй ӕмӕ ХИПУ куысты ӕндӕр аспектты тыххӕй ректор радзырдта Sputnik пресс-центры

ЦХИНВАЛ, 15 авг – Sputnik, Козаты Диана. Хуссар Ирыстоны паддзахадон университетмӕ бацӕуӕн экзаментыл коррупци нӕй, загъта Sputnik пресс-конференцийы ахуыргӕнӕндоны ректор Тедеты Вадим.

ХИПУ-йы дыууӕ мӕйы архайды фӕстӕ йӕ куыст балхынцъ кодта исӕн къамис. Тедеты Вадим радзырдта журналисттӕн къамисы куысты фӕстиуджытӕ ӕмӕ ахуыргӕнӕндонмӕ бацӕуыны конкурсы тыххӕй. Йӕ ныхӕстӕм гӕсгӕ, ацы аз конкурс уыд фондз дӕсинады фӕдыл, афтӕмӕй исӕн къамисы ахсджиаг хӕслӕвӕрд уыд аиуварс кӕнын коррупци бацӕуӕн экзаменты рӕстӕджы.

"Мӕ бон фидарӕй у зӕгъын, бацӕуӕн экзаментыл коррупци кӕй нӕй. Мах нӕ цӕст ӕрдардтам абитуриентты райсыны схемӕмӕ ӕмӕ ӕфхӕрӕм студентты ӕвзӕр бӕрӕггӕнӕнты тыххӕй фыццаг семестры дӕр. Хъуснӕдарӕг студенттӕн рахӕссӕм дзырдӕфхӕрдтӕ. Ацы процесс рахызт ӕмбӕлгӕ ӕмвӕзадмӕ", - загъта Тедеты Вадим.

Вадим Тедеев
© Sputnik / Наталья Айриян
Тедеты Вадим

Ректор ӕрхаста студентты цӕвиттон, кӕцыты ацух кодтой юридикон факультетӕй. Тедеты Вадимы ныхӕстӕм гӕсгӕ, 2018 ацы факультетмӕ бацыд 66 адӕймаджы, дыккаг курсмӕ та ахызт ӕрмӕстдӕр се рдӕг, аннӕты ацух кодтой.

Уымӕй дарддӕр ма ректор радзырдта, фӕстаг ӕзты тенденци кӕй равдыста, кӕд ӕмӕ раздӕр иууыл хуыздӕр абитуриенттӕ цыдысты республикӕйӕ ахуыр кӕнынмӕ, уӕд ныр та бирӕтӕ баззайынц Хуссар Ирыстоны ӕмӕ свӕййынц ХИПУ студенттӕ. Цӕвиттонӕн, ацы аз иунӕг майданджын абитуриент бацыд "Практикон математикӕ ӕмӕ информатикӕ"-йы факультетмӕ.

Тедеты Вадим бахахх кодта, 2016 азы ХИПУ кӕй фӕфылдӕр студентты нымӕц.

"Куы ӕппӕлӕм ахӕм фӕстиуджытӕй, уӕд бирӕтӕ фӕдзурынц, уый кӕй сӕххӕст кодтам ног комплексы руаджы. Фӕлӕ 2016 азы махӕн нырма нӕ уыд ацы комплекс. Уый нын равдыста, адӕм кӕй уынынц, куыд райтынг ис нӕ ахуыргӕнӕндон алкӕцы бӕрӕггӕнӕнтӕм гӕсгӕ дӕр", - загъта ректор.

Йӕ ныхӕстӕм гӕсгӕ, ахуыргӕнӕндоны студенттӕ цӕсгомджынӕй хъахъхъӕнынц Хуссар Ирыстоны кад республикӕйы ӕддейӕ. Ууыл ӕндавы  скъолайы ахуырады гъӕд. Уый фӕдыл Тедеты Вадим загъта бузныг республикӕйы ахуырады министрадӕн, уый тыххӕй ӕмӕ скъолаты ахуырад дӕр схызт ног ӕмвӕзадмӕ.

5