Хӕрзаудӕн акци Хуссар Ирыстоны

Хуссар Иры дыргъты хӕдзарад балӕвар кодта фыццаг тыллӕг сабитӕ ӕмӕ зӕрӕттӕн

13
(ранӕуӕггонд 11:21 01.10.2019)
Хуссар Ирыстоны иууыл егъаудӕр дыргъы хӕдзарад ауагъта хӕрзаудӕн акци ӕмӕ балӕвар кодта республикӕйы социалон ӕмӕ ахуырадон уагдӕттӕн фӕйнӕ 1,5 центнеры фӕткъуытӕ

ЦХИНВАЛ, 1 окт – Sputnik, Плиты Аза. Къуырисӕры райсомӕй хӕдтулгӕ компани "Южный сад"-ы фыццаг тыллӕджы фӕткъуытимӕ рацыд Цъунары хъӕуӕй Цхинвалмӕ – афтӕ райдыдта хӕрзаудӕн акци. Акцийы фӕдыл хъӕппӕрис бахаста компанийы инвестор, кӕцы аскъуыддзаг кодта раттын фыццаг тыллӕг хӕрзаудӕн акцийӕн.

"Абон мах ласӕм фӕйнӕ 150 килограммы фӕткъуытӕ Цхинвалы скъола-интернатмӕ, Ленингоры сабиты хӕдзармӕ, афтӕ ма реабилитацион центр "Надежда" ӕмӕ ӕвӕгӕсӕг адӕмы хӕдзармӕ. Аласдзыстӕм фӕткъуытӕ Дзауы скъола-интернет ӕмӕ ӕндӕр ахуырадон уагдӕттӕм дӕр", - радзырдта Sputnik хӕдзарады директор Бекъойты Леван.

Фыццаджы фӕткъуытӕ ӕрластой Цхинвалы скъола-интернатмӕ. Уазджытӕм рахызтысты уагдоны директор ӕмӕ кусджытӕ.

Директоры хӕдивӕг Бибылты Фатимӕ загъта бузныг хӕдзарады разамонӕгӕн ӕмӕ банысан кодта, сывӕллӕттӕн фӕткъуытӕ ӕлхӕнгӕ кӕй фӕкӕнынц, ӕмӕ уый тыххӕй абоны акци у хорз лӕвар хъомылгӕнинӕгтӕн.

Интернаты директор Тедеты Роланд банхъардта хӕдзарадӕн ӕмгуыстад – сорганизаци кӕнын сывӕллӕттӕн фӕллойады уроктӕ фӕткъуыйы дыргъдӕтты. Афтӕ ма уый бафтыдта, сывӕллӕтты фылдӕр хай баст кӕй у хъӕуимӕ, уый фӕдыл сӕ фидӕнӕн ахӕм куыст уыдзӕн пайдаджын.

Фӕткъуытыл фӕцин кодтой Цхинвалы медико-социалон центры дӕр ( раздӕры ном – ӕвӕгӕсӕг адӕмы хӕдзар).

Уагдоны директор Теблойты Чермены ныхӕстӕм гӕсгӕ, уымӕн ӕхсызгон уыд базонын, Хуссар Ирыстоны кӕй фӕзынд ахӕм егъау хӕдзарад.

Бузныджы ныхӕстӕ загъта рабилитацион центр "Надежда"-йы хистӕр Къӕбысты Эрна дӕр, кӕцы загъта, фӕткъуытӕ сын кӕй лӕвар кӕнынц.

Уӕрӕсейаг инвесторы фӕрӕзтӕй фӕткъуыты хӕдзарад сарӕзтӕуыд ацы аз уалдзӕджы Хуссар Ирыстоны Цхинвалы районы Цъунары хъӕуы. Ӕртӕ сорты фӕткъуыбӕлӕсты талатӕ ӕрластой Италийӕ ӕмӕ сӕ ныссагътой 50 гектары территорийыл.

  • Хӕрзаудӕн акци Хуссар Ирыстоны
    Хӕрзаудӕн акци Хуссар Ирыстоны
    Из архива Азы Плиевой
  • Хӕрзаудӕн акци Хуссар Ирыстоны
    Хӕрзаудӕн акци Хуссар Ирыстоны
    Из архива Азы Плиевой
  • Хӕрзаудӕн акци Хуссар Ирыстоны
    Хӕрзаудӕн акци Хуссар Ирыстоны
    Из архива Азы Плиевой
1 / 3
Из архива Азы Плиевой
Хӕрзаудӕн акци Хуссар Ирыстоны
13