Цхинвалы схорзæхджын кодтой Нафийы премийы лауреатты

Цхинвалы схорзæхджын кодтой Нафийы премийы лауреатты

401
(ранӕуӕггонд 17:44 04.10.2019)
Цыппæрæм премийы хицау баисты зынгӕ ирон литературон архайджытӕ Дыгъуызты Тенгиз, Годжысаты Нелли æмæ Баситы Зæлинæ

ЦХИНВАЛ, 4 окт — Sputnik, Плиты Фатимæ. Хуссар Ирыстоны паддзахадон университеты цыт кодтой зынгæ ирон фыссæг æмæ ахуыргонд, филологон зонæдты доктор Джусойты Нафийы номыл 2018-2019 æзты национ литературон премийы конкурсы лауреаттæн.

Цыппæрæм премийы хицау баисты зынгӕ ирон литературон архайджытӕ Дыгъуызты Тенгиз, Годжысаты Нелли æмæ Баситы Зæлинæ.

Залмæ æрхуыдтой республикӕйы разамынад, Джусойты Нафийы хиуæттæ, премийы бындурæвæрджытæ зонадон æмæ сфæлдыстадон интеллигенци. Мадзалы архайдтой ХИПУ-йы ВИА "А вдруг".

Вручение литературной премии им.Нафи Джуссойты
© Sputnik / Наталья Айриян
Цхинвалы схорзæхджын кодтой Нафийы премийы лауреатты

Цытджын церемонийы рӕстӕджы фыццаг сценæмæ фæхуыдтой æртыккаг премийы хицау Баситы Зæлинæйы. Цæгатирыстойнаг литератор ныфс бавæрдта сфæлдыстадон куыстмæ кæй бавналдзæн рæвдздæрæй.

"Чысыл зæрдæзнæт кæнын ахæм стыр кад мын кæй скодтой мæ сфæлдыстадæн. Жюрийы уæнгтæн зӕгъын бузныг. Преми мæ разæнгард кæндзæн сфæлдыстадон куыстмæ", - загъта Баситы Зæлинæ.

Поэтесса æмæ журналист, литературон преми "Булæмæргъ"-ы лауреат Годжысаты Неллийы рахицæн кодтой Нафийы номыл дыккаг премийæ.

"Стыр бузныг ацы æнæнхъæлæджы хъусдард æмæ лæвары тыххæй. Чидæриддæр батыхст ацы хъуыддагыл, уыдонæн бузныг, мах та уыдзыстæм хæсджын бирæ кусын, цæмæй Нафийы премийы аккаг суæм æцæгæйдæр", - загъта Годжысаты Нелли.

Джусойты Нафийы премийы фыццаг лауреаты хорзæхкæнынмæ хуынд æрцыд президент. Бибылты Анатолий бузныджы ныхæстæ загъта преми саразæг, фонд "Амонд"-ы разамонæг Хуыгаты Ростикæн.

"Нафи æрмæст Джусойты мыггаджы нал у, æгас Ирыстоны у. Нæхи Нафи дæр æй уымæн хонæм. Стыр бузныг конкурсы чи архайдта æмæ Хуыгаты Ростикæн ахæм стыр кад кæй кæнут Нафийæн", - загъта президент.

Нафийы премийы фыццаг лауреат ссис поэт, фыссæг æмæ журналист Дыгъуызты Тенгиз.

"Мæнæн Нафийы номыл хорзæх уæлдай кад у. Ард хæрын йæ ном ын бæрзонд кæй хæсдзæн. Хуыцау зыгъæт æмæ уæм премийы аккаг, уæм Нафийы аккаг фæдонтæ", - загъта Дыгъуызты Тенгиз.

Фонд, кæцы дæтты ацы премитæ, сарæзта Хуссар Ирыстоны раздæры хицауады сæрдар Хуыгаты Ростик. Конкурс фыццаг хатт расидт 2015 азы хӕрзаудӕн фонд "Амонд.

Вручение литературной премии им.Нафи Джуссойты
Цхинвалы схорзæхджын кодтой Нафийы премийы лауреатты

Цытджын церемонийы рæстæджы ма рахицæн кодтой ХИПУйы студентты дæр. Уæлдæр ахуыргæнæн уагдоны ирон филологийы студенттæ дыууæйæ та райстой Плиты Грисы премитæ. Бæрзонд хорзæхы хицау баисты Сиукъаты Виктория æмæ Уанеты Новик.

Фонды разамонæг Челехсаты Хъазбег йæ раныхасы банысан кодта Плиты Грисы преми ма лæвæрд цæудзæн ахуыргæнджытæн дæр.

Премийы хицæуттæ раразмæ кодтой хъуыды нырæй фæстæмæ преми дæттын стæмдæр хатт, фæрæзтæ та æвзонг фысджыты æххуысы нысанмæ аздахын.

Вручение литературной премии им. Нафи Джуссойты
© Sputnik / Наталья Айриян
Челехсаты Хъазбег

"Хуыгаты Ростик æрвылаз хицæн кæны 600 мин сомы премитæн. Ацы фарстыл ныма цæудзæн уынаффæ, фæлæ нæ фæнды ис æртæ азы иу хатт дæттын Нафийы преми, фæрæзтæ та аздахын æвзонг фысджыты мыхуыр кæныны æххуысæн", - загъта Челехсаты Хъазбег.

Мадзалы кæрон æрымбырдуæвджытæн бузныг загъта Джусойты Нафийы хо Клавдия.

401
Цхинвал

Хуссар Иры ӕнӕкусӕгон бонтӕ нӕ адарддӕр кӕндзысты

1
(ранӕуӕггонд 16:08 28.05.2020)
Июны кӕрӕттӕм баззайдзысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм

ЦХИНВАЛ, 28 мая – Sputnik, Козаты Диана. Хуссар Ирыстоны ӕнӕкусӕгон бонтӕ, кӕцытӕ расидтысты коронавирусы пандемийы тасӕй, нӕ адарддӕр кӕндзысты, загъта Sputnik президенты пресс-секретарь Гасситы Дина.

Хуссар Ирыстоны ӕнӕкусӕгон бонтӕ расидтысты 8 апрелы, уый фӕстӕ сӕ дыууӕ хатт адарддӕр кодтой 11 ӕмӕ 28 майы онг.

"Райсгӕ мадзӕлтты руаджы фӕкъаддӕр ис коронавирусы апарахаты тас. Инфекци нӕ рахызт медицинон уагдӕттӕй, цы ран сизоляци кодтой ӕмбӕстӕгты карантины. Уавӕр ис хъусдарды бын. Уый фӕдыл ӕнӕкусӕгон бонтӕ нӕ адарддӕр кодтой", - загъта Гасситы Дина.

Фӕлӕ баззадысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм. Куыстӕй ссӕрибар кодтой ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Афтӕ ма бар ис ссӕрибар кӕнын ныййарджытӕй иуы, кӕцы зилы 10 азы кары онг сывӕллонмӕ.

1
Ветеран

Хуссар Иры фӕмардуӕвӕг ветеранты бинонтӕн бакӕндзысты финансон ӕххуыс

1
(ранӕуӕггонд 14:15 28.05.2020)
Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны, уыдонӕй дыууӕ амардысты Уӕлахизы боны

ЦХИНВАЛ, 28 май – Sputnik, Козаты Диана. Хуссар Ирыстоны хицауады резервон фондӕй хицӕн ӕрцыдысты ӕхцайы фӕрӕзтӕ, ацы аз цы Стыр Фыдыбӕстон хӕсты ветерантӕ амардысты, уыдон бинонтӕн баххуыс кӕныны нысанӕн.

Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны – Кокойты Григорий, Джергаты Василий ӕмӕ Арболишвили Александр. Джергаты Василий йӕ 100-азон юбилеймӕ нӕ фӕцард цалдӕр мӕйы. Ноджы ма иу хӕстон архӕйдтыты хайадисӕг Хуссар Ирыстонӕй йӕ цардӕй ахицӕн ис Санкт-Петербурджы, йӕ мӕрдон буар ын фӕстӕдӕр ӕрластой йӕ райгуырӕн бӕстӕмӕ.

"Мах хъынцъым кӕнӕм уыцы адӕмы амӕлӕты тыххӕй, кӕцытӕ хъӕбатырӕй равдыстой сӕхи Стыр Фыдыбӕстон хӕсты быдырты. Стыр хъыгагӕн, азӕй-азмӕ уыдон кӕнынц къаддӕрӕй-къаддӕр. Майы не ‘хсӕнӕй фӕхъуыд ӕртӕ ветераны. Фӕлӕ мах сараздзыстӕм алцыдӕр, цӕмӕй сӕ ном рох макуы уа", - загъта хицауады сӕргълӕууӕг Пухаты Эрик.

 Дзӕнӕттаг ветеранты бинонтӕн ӕххуысы хуызы рахицӕн кӕндзысты фӕйнӕ сӕдӕ мин сомы.

1