Фыд Иаков

Фыццаг хатт Иры: Цхинвалы рацыд мадæлон æвзагыл аргъуаны зарджыты чиныг

30
(ранӕуӕггонд 11:57 04.11.2019)
Чиныджы презентацимæ бацыдысты динамонджытæ, рæстдинонтæ, бæрнон кусджытæ, цалдæр зарæг-скуывдтæ сæххæст кодта нæлгоймæгты хор

ЦХИНВАЛ, 4 ноя — Sputnik, Плиты Фатимæ. Цхинвалы Фырсыгъдæг Мад Майрæмы аргъуаны ацыд аргъуаны зарджыты нотæты æмбырдгонд "Хуыцауы Литургийы зарджытæ ирон æвзагыл"-ы презентаци. Чиныджы бавдисыны агъоммæ аргъуаны æрдынцары бын Дзаттиаты Анисимы хоры æххæстæй айзæлдысты динон зарджытæ.

Чиныджы рацыд Ирыстоны историйы у фыццаг фæзынд, кæд 90 æзтæй фæстæмæ куыст цыд Хуыцаумæ скуывдтæ ирон æвзагмæ раивыныл, уæд сын нотæтæ саразын у иунæг бафæлвæрд.

Нотный сборник церковных осетинских песнопений
© Sputnik / Наталья Айриян
Цхинвалы рацыд мадæлон æвзагыл аргъуаны зарджыты чиныг

Чиныг рауагъта Алайнаг епархийы совет. Мелодитæ бацæттæ кодта Хуссар Иры адæмон артист, Хетæгкаты Къостайы премийы лауреат Дзаттиаты Анисим.

"Ӕз хохы схъомыл дæн, мæ фыд уыд Дзуары лæг. Мæ чысылы бонтæй хъуыды кæнын æмæ Хуыцаумæ куывтам ирон æвзагыл. Тыхст сахат Хуыцаумæ ныхасæн æцæгæлон æвзаг неʻвзарæм. Стæй ма, æз нымайын, аргъуанæй ирон куывд куы хъуыса, уæд уый ахъаз уыдзæн æвзаджы райрæзт æмæ бахъахъхъæнынæн дæр", - загъта Дзаттиаты Анисим.

Презентация нотного сборника осетинских церковных песнопений
© Sputnik / Наталья Айриян
Агъуаны æрдынцары бын Дзаттиаты Анисимы хоры æххæстæй айзæлдысты динон зарджытæ

Чиныджы фыццаг сыфтыл мыхуыр ʻрцыд йæ рауагъдыл чи бакусыста уыдон номхыгъд. Фыд Иаковы ныхæстæм гæсгæ, чиныг рацыд 100 экземплярæй æмæ апарахат уыдзæн фæсарæнтæм дæр.

"Нæ пресс-секретары руаджы мах фæнд кæнæм чиныджы фæйнæ экземпляр арвитын дунейы уæвæг ирон диаспорæтæм, кæй зæгъын æй хъæуы Ирыстоны цы аргъуантæ ис, уыдон дæр фæхайджын уыдзысты ацы рауагъдæй. Ноджы ма иу экземпляр та арвитдзыстæм номдзыд дирижер Гергиты Валерийæн", — загъта фыд Иаков.

Чиныджы презентацимæ бацыдысты динамонджытæ, рæстдинонтæ, бæрнон кусджытæ. Культурæйы министр Зассеты Жанна баныфсæвæрдта бакусын ацы хъуыддаджы парахат кæныныл.

"Фæнды нæ самал кæнын ацы чингуытæй музыкалон ахуыргæнæндонæн, цæмæй уый хицæн курсæй бацæуа ахуырадон нывæзтмæ. Уымæй дардддæр ма министрад йæхимæ исы бæрн ацы зарджытæ рауадзын хицæн дискæй", — загъта Зассеты Жанна.

Ӕнгæс хъæппæрисимæ раныхас кодта рухсады уагдоны сæргълæууæг - Гасситы Натали баныфсæвæрдта диск банхъарын скъолаты апарахат кæнын.

Презентация нотного сборника осетинских церковных песнопений
© Sputnik / Наталья Айриян
Агъуаны æрдынцары бын Дзаттиаты Анисимы хоры æххæстæй айзæлдысты динон зарджытæ
30
Цхинвал

Хуссар Иры ӕнӕкусӕгон бонтӕ нӕ адарддӕр кӕндзысты

2
(ранӕуӕггонд 16:08 28.05.2020)
Июны кӕрӕттӕм баззайдзысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм

ЦХИНВАЛ, 28 мая – Sputnik, Козаты Диана. Хуссар Ирыстоны ӕнӕкусӕгон бонтӕ, кӕцытӕ расидтысты коронавирусы пандемийы тасӕй, нӕ адарддӕр кӕндзысты, загъта Sputnik президенты пресс-секретарь Гасситы Дина.

Хуссар Ирыстоны ӕнӕкусӕгон бонтӕ расидтысты 8 апрелы, уый фӕстӕ сӕ дыууӕ хатт адарддӕр кодтой 11 ӕмӕ 28 майы онг.

"Райсгӕ мадзӕлтты руаджы фӕкъаддӕр ис коронавирусы апарахаты тас. Инфекци нӕ рахызт медицинон уагдӕттӕй, цы ран сизоляци кодтой ӕмбӕстӕгты карантины. Уавӕр ис хъусдарды бын. Уый фӕдыл ӕнӕкусӕгон бонтӕ нӕ адарддӕр кодтой", - загъта Гасситы Дина.

Фӕлӕ баззадысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм. Куыстӕй ссӕрибар кодтой ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Афтӕ ма бар ис ссӕрибар кӕнын ныййарджытӕй иуы, кӕцы зилы 10 азы кары онг сывӕллонмӕ.

2
Ветеран

Хуссар Иры фӕмардуӕвӕг ветеранты бинонтӕн бакӕндзысты финансон ӕххуыс

2
(ранӕуӕггонд 14:15 28.05.2020)
Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны, уыдонӕй дыууӕ амардысты Уӕлахизы боны

ЦХИНВАЛ, 28 май – Sputnik, Козаты Диана. Хуссар Ирыстоны хицауады резервон фондӕй хицӕн ӕрцыдысты ӕхцайы фӕрӕзтӕ, ацы аз цы Стыр Фыдыбӕстон хӕсты ветерантӕ амардысты, уыдон бинонтӕн баххуыс кӕныны нысанӕн.

Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны – Кокойты Григорий, Джергаты Василий ӕмӕ Арболишвили Александр. Джергаты Василий йӕ 100-азон юбилеймӕ нӕ фӕцард цалдӕр мӕйы. Ноджы ма иу хӕстон архӕйдтыты хайадисӕг Хуссар Ирыстонӕй йӕ цардӕй ахицӕн ис Санкт-Петербурджы, йӕ мӕрдон буар ын фӕстӕдӕр ӕрластой йӕ райгуырӕн бӕстӕмӕ.

"Мах хъынцъым кӕнӕм уыцы адӕмы амӕлӕты тыххӕй, кӕцытӕ хъӕбатырӕй равдыстой сӕхи Стыр Фыдыбӕстон хӕсты быдырты. Стыр хъыгагӕн, азӕй-азмӕ уыдон кӕнынц къаддӕрӕй-къаддӕр. Майы не ‘хсӕнӕй фӕхъуыд ӕртӕ ветераны. Фӕлӕ мах сараздзыстӕм алцыдӕр, цӕмӕй сӕ ном рох макуы уа", - загъта хицауады сӕргълӕууӕг Пухаты Эрик.

 Дзӕнӕттаг ветеранты бинонтӕн ӕххуысы хуызы рахицӕн кӕндзысты фӕйнӕ сӕдӕ мин сомы.

2