Ветеринар

Хуссар Иры ветеринарон дохтыртæ фæбæрзонддæр кæндзысты сæ квалификаци

17
(ранӕуӕггонд 12:53 28.01.2020)
Хуссар Ирыстонмæ специалисттæ Крапоткинæйæ æрцæудзысты республикæмæ февралы мæйы кæрон. Лекцитæ кæсдзысты ног методтæм гæсгæ

ЦХИНВАЛ, 28 янв — Sputnik, Дриаты Лейла. Хуссар Ирыстонмæ хуынд æрцæудзысты Цæгат Ир æмæ Уæрæсейы хуыздæр ветеринарон уагдæтты минæвæрттæ, цæмæй лекцитæ бафæрсой æмæ практикон æххуыс бакæной республикæйы ветеринартæн. Уый тыххæй Sputnik фехъусын кодта хъæууон хæдзарады министр Пухаты Лев.

Йæ ныхæстæм гæсгæ, ацы мадзæлттæ здæхт сты ветеринарон хайады уавæр фæхуыздæр кæнын æмæ фосы дохтырты профессионалон æмвæзад фæбæрзонддæр кæнынмæ.

"Хъæууон хæдзарады къабазы цы ветдохтыртæ ис, уыдонæн лекцитæ кæсдзысты фосы низтæн профилактикон куыстытæ уадзын куыд хъæуы, стæй низ куы фæзыны, уæд йæ ликвидацийы мадзæлттæ цахæм этаптæм гæсгæ уагъд хъуамæ æрцæуа, ахæм темæтыл", - радзырдта министр.

Уый банысан кодта, специалисттæ Крапоткинæйæ кæй æрцæудзысты республикæмæ февралы мæйы кæрон. Лекцитæ кæсдзысты ног методтæм гæсгæ. Æрæджы цы ветлаборатори конд æрцыд, уым та арæзт цæудзæн ног фæзынгæ низтæн диагностикæ.

"Æмткæй ахæм тематикон уроктæй уагъд æрцæудзæн 95 сахаты. Уый фæстæ, лекцитæм цы фосы дохтыртæ байхъусой, уыдонæн лæвæрд æрцæудзысты сертификаттæ. Ахæм курсытæ фæстæдæр ауадздзыстæм зоотехниктæн дæр", - загъта Пухаты Лев.

Хъæууон хæдзарады министр бахахх кодта, фосдарды къабаз кæй у тынг ахсджиаг фарст. Фосы дохтырты фæллойæн хъæууон хæдзарады рæзты сæ хайбавæрд стыр у. Ныртæккæ кæд махмæ бирæ ис бæрнондзинад чи æвдисы, цæсгомджын куыст чи кæны, ахæм ветеринарон службæйы ветеринартæ, уæддæр дуг куыд ивы, афтæ фæзыны ног низтæ. Уыдон рафæлгъауынæн та хъæуы ног технологон ифтонггæрзтæ.

"2018 азы ноябры мæйæ нырмæ нæ республикæйы ставдкъахыл нодулярон дерматитæй æмæ африкæйаг емынæйæ фæрынчыны цаутæ нал ис. Уый та у фосы дохтыртæ цы комплексон куыст бакодтой, уый фæрцы. Кæд уавæр нырма сабыр у, уæддæр уалдзæджы æрбалæудимæ низтæ райхъал вæййынц æмæ тæссаг у уыдон апарахат кæнынæй", - загъта Пухаты Лев.

Фæлæ планон вакцинæтæ ауадзынæн, бафтыдта министр, уагдоны ис хостæ. Календарон планмæ гæсгæ уыдон арæзт æрцæудзысты, цæмæй низ мацы тæссагдзинад æрхæсса.

17