Паддзахадон арӕн

Хуссар Иры ПӔК фехъусын кодта арӕнсӕтджыты нымӕцы тыххӕй январы

14
(ранӕуӕггонд 11:52 07.02.2020)
Паддзахадон арӕны режим ӕмӕ арӕнгӕрон режимы фехӕлдты тыххӕй январы радзырдтой республикӕйы Паддзахадон ӕдасдзинады комитеты

ЦХИНВАЛ, 7 фев – Sputnik, Козаты Диана. Хуссар Ирыстоны Паддзахадон ӕдасдзинады комитет (ПӔК) фехъусын кодта январы арӕнсӕтджыты нымӕцы тыххӕй. Уагдоны бӕрӕггӕнӕнтӕм гӕсгӕ, декабрь ӕмӕ январы республикӕйы арӕн фехӕлдтой ӕмбӕстӕгты ӕмхуызон нымӕц – 36 адӕймаджы.

Паддзахадон арӕны режим январы фехӕлдтой 17 ӕмбӕстаджы, арӕнгӕрон режим та 19. Алкӕцы цауы фӕдыл дӕр ПӔК Арӕнгӕрон службӕ ауагъта равзӕрсттӕ.

"Уый фӕдыл 28 адӕймаджы фӕивар кодтой, иу адӕймаджы арвыстой Хуссар Ирыстоны территорийӕ ӕнӕ иварон санкцитӕй, ӕхсӕз арӕнсӕттӕджы бафӕдзӕхстой. Иумӕйагӕй арӕнсӕтджытӕ бафыстой паддзахадон бюджетмӕ 83 500 сомы", - фехъусын кодта ПӔК пресс-службӕйы кусӕг Биазырты Екатерина.

ПӔК арӕнгӕрон службӕ банысан кодта, паддзахадон арӕныл уавӕры тыххӕй, провокацитӕ аиуварс кӕнын ӕмӕ ӕдасдзинад сӕххӕст кӕныны фӕдыл нал уадзынц адӕм ӕмӕ транспортон фӕрӕзтӕ хизын уадзӕн пункттӕ "Раздӕхӕн" ӕмӕ "Синагур"-ы уылты 2019 азы 4 сентябрӕй фӕстӕмӕ.

Гуманитарон нысанӕн 24 январӕй фӕстӕмӕ "Раздӕхӕн" бакодтой гоймӕгтӕн, кӕцытӕ цӕрынц Ленингоры районы ӕмӕ хауынц цӕрджыты категоримӕ, кӕцытӕн нӕй Хуссар Ирыстон кӕнӕ Уӕрӕсейы ӕмбӕстӕгад, афтӕ ма нӕ исынц пенситӕ РХИ ӕмӕ УФ территорийыл.

Уымӕй дарддӕр ПӔК бахахх кодтой, Ленингор ӕмӕ Дзауы районы цӕрджытӕн дӕттынц ног пропусктӕ, цӕмӕй хизой паддзахадон арӕны сӕрты.

14
Коронавирус

Сӕйраг санитарон дохтыр коронавирусы апарахаты тыххӕй Хуссар Иры: ӕнӕстабилон уавӕр

4
(ранӕуӕггонд 16:30 23.10.2020)
Низ арӕхдӕр бахӕцы 18-69 азы кары адӕмыл, ацы кары къордмӕ хауы вирусӕй рынчынты ӕртыккаг хай, банысан кодта Коцты Марина

ЦХИНВАЛ, 23 окт — Sputnik, Козаты Диана. Хуссар Ирыстоны коронавирусӕй рынчынты ӕртын процентӕй фылдӕр хоскӕнынад цӕуынц медицинон уагдӕтты, радзырдта йӕ интервьюйы Sputnik республикӕйы сӕйраг санитарон дохтыр Коцты Марина.

Югосетпотребнадзоры сӕргълӕууӕг схуыдта коронавирусы апрахаты уавӕр Хуссар Ирыстоны "ӕнӕстабилон". Уый радон хатт ӕрсидт цӕрджытӕм, цӕмӕй ӕххӕст кӕной дохтыртӕ ӕмӕ эпидемиологты рекомендацитӕ, дарой маскӕтӕ ӕмӕ сӕхи хизой адӕмы массон ӕмбырдтӕй.

"Фӕрынчынуӕвджыты ӕртын иу проценты сты стационарты. Инфекцион рынчындон ӕмӕ сывӕллӕтты рынчындоны сты 84 пациенты коронавирусимӕ. Се хсӕн ис уӕззау рынчынтӕ дӕр. Дохтыртӕ аразынц алцыдӕр, цы ис сӕ тыхты, фӕлӕ уыцы тыхтӕ фаг не сты", - загъта Коцты Марина.

Йӕ ныхӕстӕм гӕсгӕ, фӕрынчынуӕвджыты 70 проценты сты 18-69 азы кары адӕм. 12 процентмӕ ӕввахс сты сывӕллӕттӕ 17 азы онг, ӕмӕ 18 проценты та сты 65 азӕй хистӕрдӕр адӕм.

Сӕйраг санитарон дохтыр бахахх кодта, уагдонмӕ кӕй ис тест-системӕтӕ 10 000 басгӕрст ауадзынӕн.

"Хардзгӕнӕн ӕрмӕджытимӕ проблемӕ нын уыд, фӕлӕ сӕ тагъд райстам. Уыдон дефициты сты Уӕрӕсейы дӕр. Мах алкӕмӕндӕр аразӕм тесттӕ, фӕлӕ лабораторийы хъомыс ӕмӕ адӕймагон ресурс нӕ фаг кӕнынц" – банысан кодта Коцты Марина.

Уый ма бафтыдта, зӕгъгӕ, Югосетпотребнадзорӕй дарддӕр ӕмбӕстӕгтӕн фадат ис раттын анализтӕ хисӕрмагонд лабораториты "Гемотест" ӕмӕ "КДЛ"-йы.

4
Уӕззау рӕстӕг: куыд кусы Тагъд ӕххуыс Цхинвалы

Уӕззау рӕстӕг: куыд кусы Тагъд ӕххуыс Цхинвалы

6
(ранӕуӕггонд 22:08 23.10.2020)
Тагъд ӕххуысы службӕйы куысты егъау гуырахстӕн бамбарӕн ис сӕ хӕдтулгӕты змӕлдӕй горӕты, столицӕйы уынгтыл азилгӕйӕ ӕнӕмӕнг фембӕлдзынӕ дохтырты бригадӕтыл

ЦХИНВАЛ, 23 окт — Sputnik, Плиты Фатимӕ. Хуссар Ирыстоны тагъд ӕххуысы станцы медиктӕ кусынц уӕлвӕткон уавӕрты. Дохтырты бахъӕуы ӕртӕ суткӕ фӕд-фӕдыл кусын.

Тагъд ӕххуысы дохтыр Ӕрсойты Дианайы ныхӕстӕм гӕсгӕ, бригадӕтӕ станцмӕ цӕуынц ӕрмӕст сӕ хызынтӕ медикаменттӕй баххӕст кӕнынмӕ.

"Тынг бирӕ нӕм сидынц, бирӕ ис коронавирусӕй рынчынтӕ. Абон дӕр фӕхӕццӕ кодтам рынчындонмӕ сылгоймагджы уӕззау уавӕры, кӕцыйӕн йӕ рӕуджыты 60% джиздард сты, ис ын сӕкӕрниз. Фӕлӕ ма уыимӕ иумӕ бирӕ адӕм тасӕй дӕр дзурынц 37,5 тӕвдимӕ",- загъта дохтыр.

Фӕстаг ӕртӕ къуырийы сарӕх сты коронавирусӕй рынчынтӕ, зынгӕ фӕфылдӕр ис тагъд ӕххуысы службӕйы куыст, уыимӕ иумӕ ма ис рынчынтӕ медикты хсӕн дӕр.

"Мӕ къӕхтыл ма тыххӕй лӕууын. Ӕртӕ суткӕ кусын ӕнӕрлӕугӕйӕ. Афтӕ кусынц мӕ коллегатӕ дӕр. Иу бон хъуамӕ баулӕфон ӕмӕ та уый фӕстӕ рахидзӕн радгӕсмӕ. Нӕ дохтыртӕй ӕртӕ рынчын сты, уымӕ гӕсгӕ аннӕты куыст фӕфылдӕр ис. Ӕппынӕдзух нӕм кусы цыппар бригадӕ. Алкӕцы дохтыр дӕр адӕм ӕмӕ нӕ сӕйраг дохтыры ӕфсӕрмӕй кусы уӕлвӕткон режимы", - бафтыдта медик.

Дохтыры ныхӕстӕм гӕсгӕ, хъахъхъӕнӕг ӕрмӕгӕй сты ӕххӕст. Коронавирусы апарахаты масштаб хынцгӕйӕ тагъд ӕххуысы службӕ рынчындонмӕ кӕнынц ӕрмӕст уӕззау рынчынты.

"Уӕззау рынчын чи нӕу, уыдонӕн дӕттӕм рекомендацитӕ ӕмӕ сӕ радтӕм фадыгон дохтыры бӕрнмӕ", - загъта дохтыр.

Ӕрсойты Диана ма бахахх кодта, фӕстаг ӕртӕ къуыри нырма рынчынты ӕмӕ рбадзырдты нымӕц кӕй хизы уӕлӕмӕ.

"Иууыл тынгдӕр тыхсӕм ӕнӕрлӕугӕ куыстӕй. Улӕфынӕн иу уысм дӕр рӕстӕг нӕй. Ӕхсӕв цъус вӕййы сабырдӕр", - загъта Ӕрсойты Диана.

Дохтыры ныхӕстӕм гӕсгӕ, сӕ службӕ тыхсы ӕрмӕст дохтырты цухдзинадӕй, астӕуккаг медперсонал фаг кӕны.

"Тагъд ӕххуысы сӕйраг дохтыр бахатыд, цӕмӕй нӕм фӕкӕсой кадртӕй, фӕлӕ нырма фарст скъуыддзаг нӕу", - бафтыдта уый.

6