Афтек

Доллар æмæ Covid-19: куыд фæивта хосты базар Цхинвалы

105
(ранӕуӕггонд 17:39 01.04.2020)
Иумæйагæй сисгæйæ, коронавирусы апарахат афтекты сæвзæрын кодта вирусы ныхмæ хосты дефектура, доллары рæзт та схæцыд æргътыл

ЦХИНВАЛ, 1 апр – Sputnik, Плиты Фатимæ. Коронавирусы апарахат æмæ доллары рæзт Цхинвалы афтекты тæрхджытæ раафтид кодта кæцыдæр хостæй, иннæтæн та фæбæрзонддæр кодта сæ æргътæ.

Sputnik уацхæссæг бабæрæг кодта столицæйы къорд афтекы, сæ фылдæры нæй вирусы ныхмæ препараттæ, кæцыдæр хостæн та фæфылдæр сты сæ æргътæ.

Цены на противовирусные препараты в аптеках Цхинвала
© Sputnik / Фатима Плиева
Афтек Цхинвалы

Ныр мæйæ фылдæр Цхинвалы нал ис ссарæн дезинфекцийы æрмæджытæ æмæ маскæтæ. Маскæ азы дæргъы схызт 5 сомæй 50 соммæ, фæлæ ахæм аргъыл дæр Цхинвалы афтекты нæ лæууынц.

"Фарон ма сæ уæй кодтам фондз сомыл, ныр мæнæ фæстаг маскæтæ ауæй кодтам 50 сомыл. Ӕргътæ æрмæст мах фæндонæй нæ хизынц, фæлæ фæфылдæр сты Уæрæсейы дæр", - загъта афтекы кусæг.

Столицæйы афтекты куыд æмбарын кæнынц, афтæмæй коронавирусы апарахаты фæстæ адæм скъæфынц Арбидол, Ингавирин, Эргоферон æмæ Парацетамол.

"Ацы хостæ тынг æлхæнынц, ис ма нæм дзы сывæллæтты хостæ. Спирт æмæ æндæр дезинфекцийы æрмæджытæ нæм нæй, уымæн æмæ фæстаг æрластæн нæ уыдысты бынаты дæр", - загъта Sputnik афтектæй иуы хицау Мæдинæ.

Иумæйагæй сисгæйæ, коронавирусы апарахат афтекты сæвзæрын кодта вирусы ныхмæ препаратты дефектура, доллары рæзт та схæцыд æргътыл.

"Ис нæм вирусы ныхмæ препаратты æмæ дезинфекцийы æрмæджыты дефектура. Фæлæ сæ æргътæ фæивтой æрмæст 30 -35 сомы. Ӕргъты схызт фылдæр баст у долларимæ. Арæны сæхгæдимæ та проблемæ уыдзæн шофыр ссарын, уымæн æмæ сæ алкæцы дæр Уæрæсемæ балцы фæстæ хъуамæ дыууæ къуыри уа карантиныл", - загъта æндæр афтекы кусæг.

Хостæй дарддæр ма фæстаг къуыриты бæрæг схæцыдысты халсæрттæ æмæ дыргъты æргътыл дæр.

Цены на противовирусные препараты в аптеках Цхинвала
© Sputnik / Фатима Плиева
Афтек Цхинвалы
Ивгъуыд майрӕмбоны республикӕйы хицауад бакодта уӕлӕмхасӕн карантинон мадзӕлттӕ республикӕмӕ коронавирус COVID-19 ма ‘руадзыны фӕдыл. Арӕнӕвӕрдтӕ уыдзысты 13 апрелы онг.

105
Коронавирус

Сӕйраг санитарон дохтыр коронавирусы апарахаты тыххӕй Хуссар Иры: ӕнӕстабилон уавӕр

6
(ранӕуӕггонд 16:30 23.10.2020)
Низ арӕхдӕр бахӕцы 18-69 азы кары адӕмыл, ацы кары къордмӕ хауы вирусӕй рынчынты ӕртыккаг хай, банысан кодта Коцты Марина

ЦХИНВАЛ, 23 окт — Sputnik, Козаты Диана. Хуссар Ирыстоны коронавирусӕй рынчынты ӕртын процентӕй фылдӕр хоскӕнынад цӕуынц медицинон уагдӕтты, радзырдта йӕ интервьюйы Sputnik республикӕйы сӕйраг санитарон дохтыр Коцты Марина.

Югосетпотребнадзоры сӕргълӕууӕг схуыдта коронавирусы апрахаты уавӕр Хуссар Ирыстоны "ӕнӕстабилон". Уый радон хатт ӕрсидт цӕрджытӕм, цӕмӕй ӕххӕст кӕной дохтыртӕ ӕмӕ эпидемиологты рекомендацитӕ, дарой маскӕтӕ ӕмӕ сӕхи хизой адӕмы массон ӕмбырдтӕй.

"Фӕрынчынуӕвджыты ӕртын иу проценты сты стационарты. Инфекцион рынчындон ӕмӕ сывӕллӕтты рынчындоны сты 84 пациенты коронавирусимӕ. Се хсӕн ис уӕззау рынчынтӕ дӕр. Дохтыртӕ аразынц алцыдӕр, цы ис сӕ тыхты, фӕлӕ уыцы тыхтӕ фаг не сты", - загъта Коцты Марина.

Йӕ ныхӕстӕм гӕсгӕ, фӕрынчынуӕвджыты 70 проценты сты 18-69 азы кары адӕм. 12 процентмӕ ӕввахс сты сывӕллӕттӕ 17 азы онг, ӕмӕ 18 проценты та сты 65 азӕй хистӕрдӕр адӕм.

Сӕйраг санитарон дохтыр бахахх кодта, уагдонмӕ кӕй ис тест-системӕтӕ 10 000 басгӕрст ауадзынӕн.

"Хардзгӕнӕн ӕрмӕджытимӕ проблемӕ нын уыд, фӕлӕ сӕ тагъд райстам. Уыдон дефициты сты Уӕрӕсейы дӕр. Мах алкӕмӕндӕр аразӕм тесттӕ, фӕлӕ лабораторийы хъомыс ӕмӕ адӕймагон ресурс нӕ фаг кӕнынц" – банысан кодта Коцты Марина.

Уый ма бафтыдта, зӕгъгӕ, Югосетпотребнадзорӕй дарддӕр ӕмбӕстӕгтӕн фадат ис раттын анализтӕ хисӕрмагонд лабораториты "Гемотест" ӕмӕ "КДЛ"-йы.

6
Уӕззау рӕстӕг: куыд кусы Тагъд ӕххуыс Цхинвалы

Уӕззау рӕстӕг: куыд кусы Тагъд ӕххуыс Цхинвалы

13
(ранӕуӕггонд 22:08 23.10.2020)
Тагъд ӕххуысы службӕйы куысты егъау гуырахстӕн бамбарӕн ис сӕ хӕдтулгӕты змӕлдӕй горӕты, столицӕйы уынгтыл азилгӕйӕ ӕнӕмӕнг фембӕлдзынӕ дохтырты бригадӕтыл

ЦХИНВАЛ, 23 окт — Sputnik, Плиты Фатимӕ. Хуссар Ирыстоны тагъд ӕххуысы станцы медиктӕ кусынц уӕлвӕткон уавӕрты. Дохтырты бахъӕуы ӕртӕ суткӕ фӕд-фӕдыл кусын.

Тагъд ӕххуысы дохтыр Ӕрсойты Дианайы ныхӕстӕм гӕсгӕ, бригадӕтӕ станцмӕ цӕуынц ӕрмӕст сӕ хызынтӕ медикаменттӕй баххӕст кӕнынмӕ.

"Тынг бирӕ нӕм сидынц, бирӕ ис коронавирусӕй рынчынтӕ. Абон дӕр фӕхӕццӕ кодтам рынчындонмӕ сылгоймагджы уӕззау уавӕры, кӕцыйӕн йӕ рӕуджыты 60% джиздард сты, ис ын сӕкӕрниз. Фӕлӕ ма уыимӕ иумӕ бирӕ адӕм тасӕй дӕр дзурынц 37,5 тӕвдимӕ",- загъта дохтыр.

Фӕстаг ӕртӕ къуырийы сарӕх сты коронавирусӕй рынчынтӕ, зынгӕ фӕфылдӕр ис тагъд ӕххуысы службӕйы куыст, уыимӕ иумӕ ма ис рынчынтӕ медикты хсӕн дӕр.

"Мӕ къӕхтыл ма тыххӕй лӕууын. Ӕртӕ суткӕ кусын ӕнӕрлӕугӕйӕ. Афтӕ кусынц мӕ коллегатӕ дӕр. Иу бон хъуамӕ баулӕфон ӕмӕ та уый фӕстӕ рахидзӕн радгӕсмӕ. Нӕ дохтыртӕй ӕртӕ рынчын сты, уымӕ гӕсгӕ аннӕты куыст фӕфылдӕр ис. Ӕппынӕдзух нӕм кусы цыппар бригадӕ. Алкӕцы дохтыр дӕр адӕм ӕмӕ нӕ сӕйраг дохтыры ӕфсӕрмӕй кусы уӕлвӕткон режимы", - бафтыдта медик.

Дохтыры ныхӕстӕм гӕсгӕ, хъахъхъӕнӕг ӕрмӕгӕй сты ӕххӕст. Коронавирусы апарахаты масштаб хынцгӕйӕ тагъд ӕххуысы службӕ рынчындонмӕ кӕнынц ӕрмӕст уӕззау рынчынты.

"Уӕззау рынчын чи нӕу, уыдонӕн дӕттӕм рекомендацитӕ ӕмӕ сӕ радтӕм фадыгон дохтыры бӕрнмӕ", - загъта дохтыр.

Ӕрсойты Диана ма бахахх кодта, фӕстаг ӕртӕ къуыри нырма рынчынты ӕмӕ рбадзырдты нымӕц кӕй хизы уӕлӕмӕ.

"Иууыл тынгдӕр тыхсӕм ӕнӕрлӕугӕ куыстӕй. Улӕфынӕн иу уысм дӕр рӕстӕг нӕй. Ӕхсӕв цъус вӕййы сабырдӕр", - загъта Ӕрсойты Диана.

Дохтыры ныхӕстӕм гӕсгӕ, сӕ службӕ тыхсы ӕрмӕст дохтырты цухдзинадӕй, астӕуккаг медперсонал фаг кӕны.

"Тагъд ӕххуысы сӕйраг дохтыр бахатыд, цӕмӕй нӕм фӕкӕсой кадртӕй, фӕлӕ нырма фарст скъуыддзаг нӕу", - бафтыдта уый.

13