ЦХИНВАЛ, 3 апр – Sputnik, Гӕбӕраты Элина. Цхинвайлаг волонтертӕ ифтонг кӕндзысты иунӕг карджын адӕмы хӕлцадон продукттӕ ӕмӕ медикаменттӕй карантины рӕстӕджы, фехъусын кодта Sputnik волонтерон змӕлд "Хуссар Ирыстон-Аланийы волонтерты" координатор Джиоты Аэлита.
Хуссар Ирыстоны хицауад коронавирусы апархат ма ‘руадзыны нысанӕн бакодтой карантинон мадзӕлттӕ – сӕхгӕдтой ахуырадон уагдӕттӕ ӕмӕ ӕхсӕнадон бынӕттӕ, ӕмбӕстӕгтӕн нӕй бар цӕуын республикӕйӕ. Кусынц ӕрмӕстдӕр хӕлцадон дуканитӕ ӕмӕ афтектӕ.
"Карантины уавӕрты астӕуккаг кары цӕрджытӕн дыууӕ боны иу хат фадат ис рахизын продукттӕ ӕмӕ хостӕ балхӕнынмӕ. Фӕлӕ ис адӕмы категори – зӕрӕттӕ, кӕцытӕн нӕй хиуӕттӕ, кӕнӕ та сын республикӕйы не сты. Ӕмӕ мах хъуамӕ, фыццаджыдӕр, уыдонӕн ӕххуыс кӕнӕм", - банысан кодта Джиоты Аэлита.
Инициативон къорд ныридӕгӕн ӕрӕмбырд кодтой, волонтертӕ кусдзысты хицауад ӕмӕ коронавирусы апарахат ма 'руадзыны фӕдыл оперативон штабимӕ ӕмархайгӕйӕ.
Джиоты Аэлита бахахх кодта, волонтертӕ кӕй кусдзысты республикӕйы районты дӕр.
Цалдӕр амалиуӕггӕнӕджы ӕмӕ фермеры ныридӕгӕн балӕууыдысты волонтерон змӕлды фарсмӕ ӕмӕ цӕттӕ сты раттын хӕлцадон продукттӕ.
"Афтӕ ма байгом кӕндзыстӕм кризисон хахх. Махмӕ ис психологтӕ, кӕцытӕ баххуыс кӕндзысты республикӕйы цӕрджытӕн. Бирӕ фарстытӕ ис, кӕцытӕ не ‘мбарынц нӕ ӕмбӕстӕгтӕ, фӕлӕ мах зонӕм, куыд хъӕуы архайын ахӕм уавӕры", - бафтыдта уый.
Джиоты Аэлита нысан кӕны, йӕ зӕрдӕмӕ кӕй цӕуынц ирӕтты ахӕм миниуджытӕ, куыд хӕлар зӕрдӕ ӕмӕ кӕй ӕрбаиу вӕййынц зын рӕстӕджыты, уый.
Уый ӕрсидт республикӕйы ӕмбӕстӕгтӕм, цӕмӕй ӕрбахизой волонтерон змӕлды скондмӕ ӕмӕ баххуыс кӕной карджын ӕмӕ иугонд адӕмӕн.
