Цхинвалы донифтонгад ногӕй цӕудзӕн графикмӕ гӕсгӕ

Ӕнусон проблемӕ: Цхинвалы дон ногӕй цӕудзӕн графикмӕ гӕсгӕ

16
(ранӕуӕггонд 13:01 10.04.2020)
Ног доны хӕтӕл Уанат-Цхинвалы арӕзтад балхынцъ уыдзӕн азы кӕрӕттӕм, уый руаджы горӕт донӕй ӕнӕсцух ифтонг цӕудзӕн, банысан кодтой Паддзахадон унитарон куыстуат "Водоканал"-ы

ЦХИНВАЛ, 10 апр - Sputnik, Козаты Диана. Цхинвал ӕмӕ Дзауы поселок дыууӕ мӕйы дӕргъы дон исдзысты сӕрмагонд графикмӕ гӕсгӕ. Столицӕйы къухдариуӕгад ӕрвылаз ракӕны горӕт донифтонгады ахӕм режиммӕ, уымӕн ӕмӕ уалдзӕджы мит райдайы тайын, уарынц къӕвдатӕ ӕмӕ счъизи кӕнынц магистралон хӕтӕл Едыс-Цхинвал, кӕцыйы уылты дон цӕуы столицӕмӕ.

Цхинвалы администрацийы дзырд дӕттынц аскъуыддзаг кӕнын донифтонгады проблемӕ ацы азы кӕронмӕ.

"Ацы проблемӕ фӕзыны ӕрвылаз марты кӕрӕттӕй июны райдайӕнмӕ. Хӕхты мит тайы, уары къӕвда, уый фӕдыл дон счъизи вӕййы ӕмӕ мах ахицӕн кӕнӕм уӕлӕмхасӕн резервуартӕ Брытъат ӕмӕ Дзомагъы. Ӕнӕ уыдонӕй магистралон доны хӕтӕл фаг нӕу, уый фӕдыл мах райдыдтам дӕттын дон графикмӕ гӕсгӕ", - загъта Паддзахадон унитарон куыстуат "Водоканал"-ы генералон директор Цхуырбаты Алан.

Сӕрды райдайӕнмӕ Дзауы поселок дӕр исдзӕн дон 00.00 сахатӕй 12.00 сахатмӕ ӕмӕ 15.00-ӕй 00.00 сахатмӕ ӕрвылбон. Ахӕм графикмӕ гӕсгӕ дон цӕудзӕн микрорайонтӕ "Цӕгаттаг", "Мӕскуыйаг" ӕмӕ БАМ-мӕ.

Микрорайнтӕ ЦАРЗ, "Фаллаг фарс" ӕмӕ Харебаты Исахъхъы уынгӕй Дзадтиаты Тотырбеджы уынджы онг донифтонагд цӕудзӕн 7.00 сахатӕй 11.00 сахатмӕ. Харебаты Исахъхъы уынгӕй Гафезы уынджы онг дон цӕудзӕн боны дыккаг хай – 18.00-ӕй 23.00 сахатмӕ.

Горӕты къухдариуӕгады ныхӕстӕм гӕсгӕ, ацы проблемӕ аскъуыддзаг кӕндзӕн Уанат-Цхинвал доны хӕтӕлы арӕзтад. Цхуырбаты Аланы ныхӕстӕм гӕсгӕ, арӕзтад балхынцъ уыдзӕн ацы аз декабры, ӕмӕ фидӕны столицӕ ӕххӕст бӕрцуатӕй пайда кӕндзӕн ног доны хӕтӕлӕй. Афтӕ ма уый уыдзӕн фӕстауӕрцон, сӕйраг магистраль Едыс-Цхинвалы проблемӕтӕ куы фӕзыной, уӕд.

16
Рауагъдон бал

Хуссар Ирыстоны равзӕрстой фӕстаг дзӕнгӕрӕг ӕмӕ рауагъдон балы датӕтӕ

133
(ранӕуӕггонд 21:26 02.06.2020)
Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ

ЦХИНВАЛ, 2 июн - Sputnik, Плиты Фатимӕ. Хуссар Ирыстоны ахуырады министрады равзӕрстой фӕстаг дзӕнгӕрӕг ӕмӕ рауагъдон балы датӕтӕ, фехъусын кодтой Sputnik уагдоны пресс-службӕйы.

Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ.

"Развӕлгъау сбӕлвырд кодтам 17 июны ауадзын фӕстаг дзӕнгӕрӕг ӕмӕ 18 июны та рауагъдон бал. Раздӕрау та йӕ организаци фӕнд кӕнӕм бакӕнын сывӕллӕтты сфӕлдыстадон галуаны бӕрны. Фӕлӕ уыдон дырыс датӕтӕ не сты ӕмӕ сӕ ауадзын баст уыдзӕн коронавирусы фӕдыл уавӕримӕ", - загътой пресс-службӕйы.

Рауагъдон бал хицӕнӕй ауадзынц ӕрвылаз Дзауы районы дӕр.

"Дзауы районы ахуырдзаутӕн сӕ бал республикӕйы скъолатимӕ иумӕ Цхинвалы банхъардзысты ауадзын, фӕлӕ ацы фарст нырма скъуыддзаг нӕу", - загътой ахуырады министрады.

Хуссар Ирыстоны ацы аз скъолайӕн хӕрзбон зӕгъдзысты 468 ахуырдзауы, уыдонӕй цыппар иттӕг хорз нысӕнттыл. Иу чызг у сызгъӕрин майданмӕ претендент. Цыппар иууыл хуыздӕр бӕрӕггӕнӕнтимӕ ахуырдзауы сты гимназитӕ "Рухс" ӕмӕ "Альбион"-ӕй.

133
МСНК кусджытӕ

МХМ къордтӕ райдыдтой цӕттӕ кӕнын Уӕлахизы парадмӕ Цхинвалы

7
(ранӕуӕггонд 16:00 02.06.2020)
Хуссар Ирыстоны Мидхъуыддӕгты министрады кусджытӕ райдыдтой рӕнхъон тренировкӕтӕ Милицийы сӕрмагонд нысаниуӕджы къорды бӕстыхайы

ЦХИНВАЛ, 2 июн - Sputnik. Хуссар Ирыстоны Мидхъуыддӕгты министрады (МХМ) парадон къордтӕ, кӕцытӕ хайад райсдзысты бӕрӕгбонон маршы Цхинвалы центры, райдыдтой рӕнхъон цӕттӕкӕнынад, хъусын кӕны МХМ пресс-службӕ.

Амӕйразмӕ республикӕйы президент Бибылты Анатолий фехъусын кодта, Стыр Фыдбӕстон хӕсты Уӕлахизы 75 азы юбилейы цытӕн бӕрӕгбонон парад кӕй ацӕудзӕн Хуссар Ирыстоны столицӕйы 24 июны. Майы республикӕйы ацыдысты сӕрмагонд парадтӕ Стыр Фыдыбӕстон хӕсты ветерантӕн.

"Ныртӕккӕ парадон къордтӕ кусынц рӕнхъон цӕттӕкӕнынадыл. Парады хайад райсынмӕ цӕттӕ кӕнынц мидхъуыддӕгты органты 200-мӕ ӕввахс кусӕджы – сылгоймӕгты парадон къорд, милицийы сӕрмагонд нысаниуӕджы къорды кусджытӕ, афтӕ ма Хуссар Ирыстоны МХМ курсанттӕ, кӕцытӕ ахуыр кӕнынц УФ МХМ профилон ахуырадон уагдӕтты", - радзырдтой уагдоны.

Афтӕ ма парады рацӕудзӕн милицийы сӕрмагонд нысаниуӕджы къорды (МСНК) бронетехникӕ дӕр – цыппар БТР-80. Нырма репетицитӕ цӕуынц МСНК бӕстыхайы, уый фӕстӕ уыдон адарддӕр уыдзысты республикӕйы Хъахъхъӕнынады министрады ӕмӕ УФ 4-ӕм ӕфсӕддон базӕйы плацыл. Уӕлахизы парады генералон репетицитӕ уагъд цӕудзысты Театралон фӕзуатыл 19-22 июны.

7