НАТО Гуырдзыстоны

Хъахъхъӕнынады министр фехъусын кодта Хуссар Иры ӕдасдзинады сӕйраг ӕртхъирӕнтӕ

6
(ранӕуӕггонд 15:23 13.04.2020)
Министры хъуыдымӕ гӕсгӕ, бӕлвырд ныхмӕлӕууӕджы ӕфсадӕй дарддӕр ӕдасдзинады ӕртхъирӕн у ӕхсӕнадӕмон терроризм

ЦХИНВАЛ, 13 апр – Sputnik. Хуссар Ирыстоны ӕдасдзинады сӕйраг ӕртхъирӕн цӕуы Гуырдзыстонӕй, фехъусын кодта эксклюзивон интервьюйы Sputnik хъахъхъӕнынады министр Гассеты Ибрагим.

Министр банысан кодта, республикӕ сомбон кӕй уыдзӕн конфликты Гуырдзыстонимӕ, кӕцыйы къухдариуӕгад нӕ разы кӕны райсын йӕхимӕ бӕрндзинад тыхӕй ма пайда кӕныны фӕдыл.

"Гуырдзыстон нывӕнды бахизын НАТО-йы скондмӕ. Уагъд цӕуынц алыгъуызон ахуыртӕ нӕ арӕнтӕм хӕстӕг НАТО-йы къухдариуӕгады бын. Бӕлвырд ныхмӕлӕууӕджы ӕфсад фӕстаг 15-20 азмӕ бакодтой НАТО-йы стандарттӕм, семӕ активонӕй кусынц америкайаг инструктортӕ", - загъта Гассеты Ибрагим.

Афтӕ ма министры хъуыдымӕ гӕсгӕ, республикӕйы ӕдасдзинадӕн ӕртхъирӕн хӕссы ӕхсӕнадӕмон терроризм. Гассеты Ибрагим банысан кодта, терроризм гӕнӕн ис кӕй суа ӕцӕг ӕртхъирӕн Хуссар Ирыстоны ӕдасдзинадӕн, афтӕ ма расайа арӕнгӕрон локалон конфликттӕ, кӕцытӕ уый фӕстӕ ахиздзысты егъау ӕфсӕддон агрессимӕ.

Министр банысан кодта, ацы фарстытӕ иууылдӕр кӕй сты Хуссар Ирыстоны националон ӕдасдзинады концепцийы, кӕцыйы бындурыл Хъахъхъӕнынады министрад аразы Ӕфсӕддон доктринӕ, кӕцы ӕввахс рӕстӕджы бавдисдзысты президентӕн.

6
Цхинвал

Хуссар Иры ӕнӕкусӕгон бонтӕ нӕ адарддӕр кӕндзысты

8
(ранӕуӕггонд 16:08 28.05.2020)
Июны кӕрӕттӕм баззайдзысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм

ЦХИНВАЛ, 28 мая – Sputnik, Козаты Диана. Хуссар Ирыстоны ӕнӕкусӕгон бонтӕ, кӕцытӕ расидтысты коронавирусы пандемийы тасӕй, нӕ адарддӕр кӕндзысты, загъта Sputnik президенты пресс-секретарь Гасситы Дина.

Хуссар Ирыстоны ӕнӕкусӕгон бонтӕ расидтысты 8 апрелы, уый фӕстӕ сӕ дыууӕ хатт адарддӕр кодтой 11 ӕмӕ 28 майы онг.

"Райсгӕ мадзӕлтты руаджы фӕкъаддӕр ис коронавирусы апарахаты тас. Инфекци нӕ рахызт медицинон уагдӕттӕй, цы ран сизоляци кодтой ӕмбӕстӕгты карантины. Уавӕр ис хъусдарды бын. Уый фӕдыл ӕнӕкусӕгон бонтӕ нӕ адарддӕр кодтой", - загъта Гасситы Дина.

Фӕлӕ баззадысты арӕнӕвӕрдтӕ, кӕцытӕ хауынц кусджыты кӕцыдӕр категоритӕм. Куыстӕй ссӕрибар кодтой ӕвгъӕдджын сылгоймӕгты, 65 азы карӕй хистӕрдӕр адӕмы, ӕмӕ иугӕндзойнон низтӕй рынчын ӕмбӕстӕгты. Уыдонӕн фиддзысты сӕ мызд дӕр.

Афтӕ ма бар ис ссӕрибар кӕнын ныййарджытӕй иуы, кӕцы зилы 10 азы кары онг сывӕллонмӕ.

8
Ветеран

Хуссар Иры фӕмардуӕвӕг ветеранты бинонтӕн бакӕндзысты финансон ӕххуыс

11
(ранӕуӕггонд 14:15 28.05.2020)
Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны, уыдонӕй дыууӕ амардысты Уӕлахизы боны

ЦХИНВАЛ, 28 май – Sputnik, Козаты Диана. Хуссар Ирыстоны хицауады резервон фондӕй хицӕн ӕрцыдысты ӕхцайы фӕрӕзтӕ, ацы аз цы Стыр Фыдыбӕстон хӕсты ветерантӕ амардысты, уыдон бинонтӕн баххуыс кӕныны нысанӕн.

Хуссар Ирыстоны майы сӕ ахицӕн сты Стыр Фыдыбӕстон хӕсты ӕртӕ ветераны – Кокойты Григорий, Джергаты Василий ӕмӕ Арболишвили Александр. Джергаты Василий йӕ 100-азон юбилеймӕ нӕ фӕцард цалдӕр мӕйы. Ноджы ма иу хӕстон архӕйдтыты хайадисӕг Хуссар Ирыстонӕй йӕ цардӕй ахицӕн ис Санкт-Петербурджы, йӕ мӕрдон буар ын фӕстӕдӕр ӕрластой йӕ райгуырӕн бӕстӕмӕ.

"Мах хъынцъым кӕнӕм уыцы адӕмы амӕлӕты тыххӕй, кӕцытӕ хъӕбатырӕй равдыстой сӕхи Стыр Фыдыбӕстон хӕсты быдырты. Стыр хъыгагӕн, азӕй-азмӕ уыдон кӕнынц къаддӕрӕй-къаддӕр. Майы не ‘хсӕнӕй фӕхъуыд ӕртӕ ветераны. Фӕлӕ мах сараздзыстӕм алцыдӕр, цӕмӕй сӕ ном рох макуы уа", - загъта хицауады сӕргълӕууӕг Пухаты Эрик.

 Дзӕнӕттаг ветеранты бинонтӕн ӕххуысы хуызы рахицӕн кӕндзысты фӕйнӕ сӕдӕ мин сомы.

11