Хицауад

Хуссар Иры карантинон мадзӕлттӕ адарддӕр кодтой 26 апрелы онг

24
(ранӕуӕггонд 14:48 17.04.2020)
Хицауады уынаффӕ адарддӕр кодта арӕнӕвӕрдты ӕмгъуыд, кӕцытӕ райстой марты кӕрӕтты. Афтӕ ма 30 апрелы онг адарддӕр кодтой карантин республикӕйы ахуырадон уагдӕтты, уым уагъд цӕудзӕн дистанцион ахуыр

ЦХИНВАЛ, 17 апр - Sputnik. Хуссар Ирыстоны хицауад адарддӕр кодта 26 апрелы онг карантинон мадзӕлтты ӕмгъуыд, кӕцытӕ райстой коронавирусон инфекцийы ныхмӕ тох кӕнынӕн. Уынаффӕ райстой майрӕмбоны республикӕмӕ хӕстӕг паддзахӕдты COVID-19-ы фӕрынчынуӕвджыты нымӕцы фӕфылдӕры тыххӕй, афтӕ ма инфекци республикӕйы территоримӕ ма ‘рбауадзыны нысанӕн.

"Хуссар Ирыстоны территоримӕ коронавирусон инфекци ма ‘рбауадзыны нысанӕн республикӕйы къухдариуӕгад аскъуыддзаг кодта адарддӕр кӕнын арӕнӕвӕрдон мадзӕлтты ӕмгъуыд 2020 азы 26 апрелы онг. Мах нӕ хъус дарӕм уавӕрмӕ ӕмӕ куы бахъӕуа, уӕд райсдзыстӕм уӕлӕмхасӕн мадзӕлттӕ", - банысан кодта рабадтыл хицауады сӕрдар Пухаты Эрик.

Афтӕ ма хицауад бахӕс кодта республикӕйы ахуырадон уагдӕттӕн ракӕнын ахуырадон процесс дистанцион формӕмӕ 30 апрелы онг.

Ахуырад ӕмӕ зонады министр Гасситы Наталийы ныхӕстӕм гӕсгӕ, скъоладзаутӕ уалдзыгон нысӕнттӕ райсдзысты дистанцион ахуырады формӕмӕ гӕсгӕ.

Амӕйразмӕ президент Бибылты Анатолий расидт 8-ӕй 20-ӕм апрельмӕ ӕнӕкусӕгон бонтӕ. Республикӕйы хицауад бакодта уӕлӕмхасӕн карантинон мадзӕлттӕ республикӕйы коронавирусы апарахат ма ‘руадзыны нысанӕн. Уӕрӕсеимӕ арӕн сӕхгӕдтой 1 майы онг. Марты республикӕйы къухдариуӕгад фехъусын кодта Гуырдзыстонимӕ паддзахадон арӕны сӕхгӕды тыххӕй. Республикӕйы ӕхгӕд сты ахуырадон уагдӕттӕ ӕмӕ ӕхсӕнадон бынӕттӕ. Кусынц ӕрмӕстдӕр хӕлцадон дуканитӕ ӕмӕ афтектӕ.

24
Рауагъдон бал

Хуссар Ирыстоны равзӕрстой фӕстаг дзӕнгӕрӕг ӕмӕ рауагъдон балы датӕтӕ

133
(ранӕуӕггонд 21:26 02.06.2020)
Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ

ЦХИНВАЛ, 2 июн - Sputnik, Плиты Фатимӕ. Хуссар Ирыстоны ахуырады министрады равзӕрстой фӕстаг дзӕнгӕрӕг ӕмӕ рауагъдон балы датӕтӕ, фехъусын кодтой Sputnik уагдоны пресс-службӕйы.

Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ.

"Развӕлгъау сбӕлвырд кодтам 17 июны ауадзын фӕстаг дзӕнгӕрӕг ӕмӕ 18 июны та рауагъдон бал. Раздӕрау та йӕ организаци фӕнд кӕнӕм бакӕнын сывӕллӕтты сфӕлдыстадон галуаны бӕрны. Фӕлӕ уыдон дырыс датӕтӕ не сты ӕмӕ сӕ ауадзын баст уыдзӕн коронавирусы фӕдыл уавӕримӕ", - загътой пресс-службӕйы.

Рауагъдон бал хицӕнӕй ауадзынц ӕрвылаз Дзауы районы дӕр.

"Дзауы районы ахуырдзаутӕн сӕ бал республикӕйы скъолатимӕ иумӕ Цхинвалы банхъардзысты ауадзын, фӕлӕ ацы фарст нырма скъуыддзаг нӕу", - загътой ахуырады министрады.

Хуссар Ирыстоны ацы аз скъолайӕн хӕрзбон зӕгъдзысты 468 ахуырдзауы, уыдонӕй цыппар иттӕг хорз нысӕнттыл. Иу чызг у сызгъӕрин майданмӕ претендент. Цыппар иууыл хуыздӕр бӕрӕггӕнӕнтимӕ ахуырдзауы сты гимназитӕ "Рухс" ӕмӕ "Альбион"-ӕй.

133
МСНК кусджытӕ

МХМ къордтӕ райдыдтой цӕттӕ кӕнын Уӕлахизы парадмӕ Цхинвалы

7
(ранӕуӕггонд 16:00 02.06.2020)
Хуссар Ирыстоны Мидхъуыддӕгты министрады кусджытӕ райдыдтой рӕнхъон тренировкӕтӕ Милицийы сӕрмагонд нысаниуӕджы къорды бӕстыхайы

ЦХИНВАЛ, 2 июн - Sputnik. Хуссар Ирыстоны Мидхъуыддӕгты министрады (МХМ) парадон къордтӕ, кӕцытӕ хайад райсдзысты бӕрӕгбонон маршы Цхинвалы центры, райдыдтой рӕнхъон цӕттӕкӕнынад, хъусын кӕны МХМ пресс-службӕ.

Амӕйразмӕ республикӕйы президент Бибылты Анатолий фехъусын кодта, Стыр Фыдбӕстон хӕсты Уӕлахизы 75 азы юбилейы цытӕн бӕрӕгбонон парад кӕй ацӕудзӕн Хуссар Ирыстоны столицӕйы 24 июны. Майы республикӕйы ацыдысты сӕрмагонд парадтӕ Стыр Фыдыбӕстон хӕсты ветерантӕн.

"Ныртӕккӕ парадон къордтӕ кусынц рӕнхъон цӕттӕкӕнынадыл. Парады хайад райсынмӕ цӕттӕ кӕнынц мидхъуыддӕгты органты 200-мӕ ӕввахс кусӕджы – сылгоймӕгты парадон къорд, милицийы сӕрмагонд нысаниуӕджы къорды кусджытӕ, афтӕ ма Хуссар Ирыстоны МХМ курсанттӕ, кӕцытӕ ахуыр кӕнынц УФ МХМ профилон ахуырадон уагдӕтты", - радзырдтой уагдоны.

Афтӕ ма парады рацӕудзӕн милицийы сӕрмагонд нысаниуӕджы къорды (МСНК) бронетехникӕ дӕр – цыппар БТР-80. Нырма репетицитӕ цӕуынц МСНК бӕстыхайы, уый фӕстӕ уыдон адарддӕр уыдзысты республикӕйы Хъахъхъӕнынады министрады ӕмӕ УФ 4-ӕм ӕфсӕддон базӕйы плацыл. Уӕлахизы парады генералон репетицитӕ уагъд цӕудзысты Театралон фӕзуатыл 19-22 июны.

7