Картофы быдыр

Скъолатӕ ӕмӕ куыстуӕттӕн: Дзауы районы ныссадздзысты ӕхсӕз гектар быдыры картоф

72
(ранӕуӕггонд 15:46 21.04.2020)
Быдыртӕ сты Дзауы районы Итраспис, Църу ӕмӕ Чеселтгомы. Раздӕр  картофы быдыртӕ уыд ӕрмӕст фермертӕн, ныр ацы хъуыддаджы дыккаг аз бахызт районы хъӕууонхӕдзарадон управлени

ЦХИНВАЛ, 21 апр — Sputnik, Плиты Фатимæ. Хуссар Ирыстоны Дзауы районы быдырты  хъæууон хъæдзарады управлени ныссадзæн æхсæз гектар картоф. Ӕркæнгæ тыллæг уæрст цæудзæн ахуырадон уагдæттыл æмæ социалон объекттыл, фехъусын кодта Sputnik районы разамонæг Джиоты Андрей.

Дзауы район нымад цӕуы картоф ӕркӕнынӕн хуыздӕр бынатыл ӕгас Хуссар Ирыстоны. Раздӕр  картофы быдыртӕ уыд ӕрмӕст фермертӕн, ныр ацы хъуыддаджы дыккаг аз бахызт районы хъӕууонхӕдзарадон управлени.

"Фæззæджы бахуым кодтам 6 гектары бæрц зæхх, уым фæнд кæнӕм ныссадзын картоф. Чысыл нын нæ нывæзт къуылымпы кæнынц коронаврирусы апарахаты тасæй цы тобæтæ ис, уыдон, фæлæ уæддæр хъуамæ æрласын кæнæм тауинаг", - загъта районы хистӕр.

Быдыртæ сты Итрапис, Църу ӕмӕ Чеселтгомы. Тыллӕг ӕрӕмбырд кӕндзысты зиуты руаджы ӕмӕ стӕй уайтагъд быдырӕй уӕрст цӕудзӕн скъолатӕ ӕмӕ сабидӕттыл, уымӕн ӕмӕ сын бафснайыны бынат нӕй. Афтӕ бакодтой фыццаг тыллӕгӕн дӕр.

72
Рауагъдон бал

Хуссар Ирыстоны равзӕрстой фӕстаг дзӕнгӕрӕг ӕмӕ рауагъдон балы датӕтӕ

139
(ранӕуӕггонд 21:26 02.06.2020)
Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ

ЦХИНВАЛ, 2 июн - Sputnik, Плиты Фатимӕ. Хуссар Ирыстоны ахуырады министрады равзӕрстой фӕстаг дзӕнгӕрӕг ӕмӕ рауагъдон балы датӕтӕ, фехъусын кодтой Sputnik уагдоны пресс-службӕйы.

Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ.

"Развӕлгъау сбӕлвырд кодтам 17 июны ауадзын фӕстаг дзӕнгӕрӕг ӕмӕ 18 июны та рауагъдон бал. Раздӕрау та йӕ организаци фӕнд кӕнӕм бакӕнын сывӕллӕтты сфӕлдыстадон галуаны бӕрны. Фӕлӕ уыдон дырыс датӕтӕ не сты ӕмӕ сӕ ауадзын баст уыдзӕн коронавирусы фӕдыл уавӕримӕ", - загътой пресс-службӕйы.

Рауагъдон бал хицӕнӕй ауадзынц ӕрвылаз Дзауы районы дӕр.

"Дзауы районы ахуырдзаутӕн сӕ бал республикӕйы скъолатимӕ иумӕ Цхинвалы банхъардзысты ауадзын, фӕлӕ ацы фарст нырма скъуыддзаг нӕу", - загътой ахуырады министрады.

Хуссар Ирыстоны ацы аз скъолайӕн хӕрзбон зӕгъдзысты 468 ахуырдзауы, уыдонӕй цыппар иттӕг хорз нысӕнттыл. Иу чызг у сызгъӕрин майданмӕ претендент. Цыппар иууыл хуыздӕр бӕрӕггӕнӕнтимӕ ахуырдзауы сты гимназитӕ "Рухс" ӕмӕ "Альбион"-ӕй.

139
МСНК кусджытӕ

МХМ къордтӕ райдыдтой цӕттӕ кӕнын Уӕлахизы парадмӕ Цхинвалы

7
(ранӕуӕггонд 16:00 02.06.2020)
Хуссар Ирыстоны Мидхъуыддӕгты министрады кусджытӕ райдыдтой рӕнхъон тренировкӕтӕ Милицийы сӕрмагонд нысаниуӕджы къорды бӕстыхайы

ЦХИНВАЛ, 2 июн - Sputnik. Хуссар Ирыстоны Мидхъуыддӕгты министрады (МХМ) парадон къордтӕ, кӕцытӕ хайад райсдзысты бӕрӕгбонон маршы Цхинвалы центры, райдыдтой рӕнхъон цӕттӕкӕнынад, хъусын кӕны МХМ пресс-службӕ.

Амӕйразмӕ республикӕйы президент Бибылты Анатолий фехъусын кодта, Стыр Фыдбӕстон хӕсты Уӕлахизы 75 азы юбилейы цытӕн бӕрӕгбонон парад кӕй ацӕудзӕн Хуссар Ирыстоны столицӕйы 24 июны. Майы республикӕйы ацыдысты сӕрмагонд парадтӕ Стыр Фыдыбӕстон хӕсты ветерантӕн.

"Ныртӕккӕ парадон къордтӕ кусынц рӕнхъон цӕттӕкӕнынадыл. Парады хайад райсынмӕ цӕттӕ кӕнынц мидхъуыддӕгты органты 200-мӕ ӕввахс кусӕджы – сылгоймӕгты парадон къорд, милицийы сӕрмагонд нысаниуӕджы къорды кусджытӕ, афтӕ ма Хуссар Ирыстоны МХМ курсанттӕ, кӕцытӕ ахуыр кӕнынц УФ МХМ профилон ахуырадон уагдӕтты", - радзырдтой уагдоны.

Афтӕ ма парады рацӕудзӕн милицийы сӕрмагонд нысаниуӕджы къорды (МСНК) бронетехникӕ дӕр – цыппар БТР-80. Нырма репетицитӕ цӕуынц МСНК бӕстыхайы, уый фӕстӕ уыдон адарддӕр уыдзысты республикӕйы Хъахъхъӕнынады министрады ӕмӕ УФ 4-ӕм ӕфсӕддон базӕйы плацыл. Уӕлахизы парады генералон репетицитӕ уагъд цӕудзысты Театралон фӕзуатыл 19-22 июны.

7