Цхинвал

Хуссар Иры МХМ сӕргълӕууӕг саргъ кодта милицийы куыстӕн карантины уавӕрты

12
(ранӕуӕггонд 13:13 22.04.2020)
Барадхъахъхъӕнӕг органты кусджытӕ сӕ хъус дарынц республикӕйы хисӕрмагонд изоляци ӕмӕ карантины режим ӕххӕст кӕнынмӕ

ЦХИНВАЛ, 22 апр - Sputnik. Хуссар Ирыстоны мидхъуыддӕгты министр, милицийы инӕлар-майор Наниты Игорь банысан кодта, уагдоны кусджытӕ бӕрнон ахаст кӕй дарынц сӕ хӕслӕвӕрдтӕ ӕххӕст кӕнынмӕ, кӕцытӕ баст сты карантинон мадзӕлттимӕ, афтӕ ма сын бузныг загъта оперативон куысты тыххӕй. Уый тыххӕй министр фехъусын кодта уагдоны къухдариуӕгадимӕ фембӕлдыл, хъусын кӕны Мидхъуыддӕгты министрады (МХМ) пресс-службӕ.

Хуссар Ирыстоны марты кӕрӕттӕй бакодтой арӕнӕвӕрдтӕ COVID-19-ы апарахат ма ‘руадзыны нысанӕн. МХМ кусджытӕ сӕ хъус дарынц республикӕйы хисӕрмагонд изоляци ӕмӕ карантины режим ӕххӕст кӕнынмӕ.

Милицийы къордтӕ фембӕлынц Уӕрӕсеимӕ арӕныл уӕзласӕн ӕмӕ пассажирон автотранспортыл ӕмӕ йемӕ ацӕуынц Цхинвалы онг, уый фӕстӕ пассажирты бакӕнынц карантинмӕ республикон рынчындонмӕ. Ахӕм процедурӕ рацӕуынц уӕзласӕн автотранспорты шофыртӕ дӕр. Афтӕ ма милицийы кусджытӕ хъахъхъӕнынц медицинон уагдӕттӕ, цӕмӕй пациенттӕ ма фехалой карантины режим.

Наниты Игорь бахӕс кодта экономикон фыдракӕндтимӕ тохы хайады хистӕрӕн фӕтыхджындӕр кӕнын хъусдард арӕнӕвӕрдон мадзӕлттӕ ӕххӕст кӕнынмӕ, кӕцытӕ бакодтой амалиуӕггӕнджыты фӕдыл пандемийы рӕстӕджы.

Уымӕй дарддӕр, рабадты рӕстӕджы министрӕн радзырдтой республикӕйы фӕндӕгтыл уавӕры тыххӕй ивгъуыд къуыри. Хуссар Ирыстоны ӕрцыд ӕртӕ аварийы, кӕцыты фӕстиуӕгӕн бахъыгдард сты цыппар адӕймаджы. Паддзахадон автоинспекцийы кусджытӕ ӕрурӕдтой 13 шофыры, кӕцытӕ скъӕрдтой хӕдтулгӕтӕ нозтджынӕй. Иумӕйагӕй барадхъахъхъӕнджытӕ сбӕрӕг кодтой фӕндагон змӕлды 179 фӕткхалды.

МХМ сӕргълӕууӕг бафтыдта, зӕгъгӕ, кусджыты куыст COVID-19-ы апарахат ма ‘руадзыны фӕдыл хъуамӕ ма бандава сӕ сӕйраг архайдыл фыдракӕндтимӕ тохы фӕдыл.

Республикӕйы хицауад бакодта уӕлӕмхасӕн карантинон мадзӕлттӕ республикӕйы коронавирусы апарахат ма ‘руадзыны нысанӕн. Уӕрӕсеимӕ арӕн сӕхгӕдтой 1 майы онг. Марты республикӕйы къухдариуӕгад фехъусын кодта Гуырдзыстонимӕ паддзахадон арӕны сӕхгӕды тыххӕй. Республикӕйы ӕхгӕд сты ахуырадон уагдӕттӕ ӕмӕ ӕхсӕнадон бынӕттӕ. Кусынц ӕрмӕстдӕр хӕлцадон дуканитӕ ӕмӕ афтектӕ.

Амӕйразмӕ президент Бибылты Анатолий адарддӕр кодта ӕнӕкусӕгон бонтӕ 30 апрелы онг.

12
Цхинвал

Хуссар Иры цӕрджытӕм ацы къуыри ӕнхъӕлмӕ кӕсынц дӕргъвӕтин улӕфт бонтӕ

2
Республикӕйы цӕрджытӕ улӕфдзысты ӕртӕ боны фӕд-фӕдыл Хуссар Ирыстоны хӕдбардзинад расидыны Акт райсыны боны цытӕн

ЦХИНВАЛ, 28 май — Sputnik. Хуссар Ирыстон ацы къуыри нысан кӕны РХИ хӕдбардзинады Акт райсыны бон, уый фӕдыл республикӕйы цӕрджытӕ улӕфдзысты ӕртӕ боны.

Бӕргбонон датӕ майрӕмбонмӕ кӕй ӕрхаудта, уый фӕдыл кусӕгон цӕрджытӕн дӕргъвӕтин улӕфт бонтӕ уыдзысты 29-31 майы.

Хуссар Ирыстоны хӕдбардзинад расидыны Акт райста республикӕйы Уӕлдӕр совет 1992 азы 29 майы. Президенты барамындмӕ гӕсгӕ, ацы датӕ бахастой Хуссар Ирыстоны бӕрӕгбонтӕ ӕмӕ зӕрдылдарӕн датӕты къӕлиндармӕ.

2
Хуссар Ир карантины

"Зынаргъ коронавирус": цас лӕууы Хуссар Ирӕн COVID-19-имӕ тох

5
(ранӕуӕггонд 15:26 27.05.2020)
Фӕрӕзтӕ, сӕйраджыдӕр, хицӕн кӕнынц паддзахады сӕргълӕууӕг ӕмӕ хицауады фӕстауӕрцон фондтӕй

ЦХИНВАЛ, 27 мая – Sputnik, Козаты Диана. Коронавирусон инфекцийы апарахат ма ‘руадзынӕн ӕмӕ COVID-19-ӕй рынчынты хоскӕнынадӕн Хуссар Ирыстон ныридӕгӕн рахицӕн кодта 11 милуан сомы. Президенты администрацийы бӕрӕггӕнӕнтӕм гӕсгӕ, фӕрӕзты фылдӕр хай рахицӕн кодтой президент ӕмӕ хицауады фӕстауӕрцон фондтӕй.

Цӕвиттонӕн, уазӕгдон "Алан" сцалцӕг кӕныныл бахардз кодтой 243 мин сомы. Дзауы районы рынчындон бацӕттӕ кӕнынӕн президенты фондӕй рахицӕн кодтой 142 мин сомы.

Югосетпотребнадзор райста иу милуан соммӕ ӕввахс сӕрмагонд хъахъхъӕнынады фӕрӕзтӕ, ифтонггарз ӕмӕ вирусологион лабораторийӕн ӕрмӕджытӕ балхӕнынӕн.

Республикӕйы ӕмбӕстӕгтӕн гуманитарон ӕххуыс ласыны хӕрдзтӕн пандемийы рӕстӕджы рахицӕн кодтой 263 мин сомы.

Ацы фӕрӕзтӕ – иу милуан ӕмӕ 600 мин сомы – рахицӕн кодтой президенты фӕстауӕрцон фондӕй.

Хицауадон фондӕй ӕхцатӕ рахицӕн кодтой Ӕнӕниздзинад хъахъӕнынады министрад, Дзауы район ӕмӕ Хъахъхъӕнынады министрадӕн.

Ӕнӕниздзинад хъахъхъӕнынад ӕмӕ социалон райрӕзты министрад райстой 6,5 милуан сомы хостӕ ӕмӕ медицинон ӕрмӕджытӕ балхӕнынӕн.

Дзауы районы администрацийӕн рахицӕн кодтой сӕдӕ мин сомӕй фылдӕр районон рынчындонӕн ифтонггарз балхӕнынӕн, афтӕ ма медицинон уагдоны рудзгуытыл хызӕгтӕ сӕвӕрынӕн.

Иу милуан сомы бахардз кодтой УФ ӕфсӕддон ахуырадон уагдӕтты курсантты ӕрласыныл, кӕцытӕ цыдысты сӕ фыдыбӕстӕмӕ Уӕрӕсейы ахуыр ӕмгъуыдӕй раздӕр кӕй фӕцис, уый тыххӕй.

Афтӕ ма ӕрдӕг милуан сомӕй фылдӕр бахардз кодта МХМ сӕрмагонд хъахъхъӕнынады ӕмӕ дезинфекцион фӕрӕзтӕ балхӕнынӕн.

Уымӕй дарддӕр, стыр суммӕ хардз кӕнынц карантиныл уӕвӕг адӕмы хӕлцадыл. Пациентты хиуӕтты нал уадзынц хӕссын медицинон уагдӕттӕм хӕлцадон продукттӕ.

Инфекциимӕ тох нырма нӕ фӕцис. Республикӕйы медицинон уагдӕтты хоскӕнынад нырма цӕуынц аст адӕймаджы коронавирусы диагнозимӕ. Афтӕ ма республикӕмӕ ӕрцӕудзысты МХМ курсанттӕ ӕмӕ республикӕйы ӕмбӕстӕгтӕ ФХМ хаххыл.

5