Тасойты Игорь

Хуссарирыстойнаг зарæггæнæг хайад исы æппæтуæрæсейон онлайн-фестивалы

29
(ранӕуӕггонд 12:58 23.04.2020)
Цхинвайлаг вокалист Тасойты Игоры хайадистæй секстеты ма архайынц зарæггæнджтæ АИШ, Украина, Герман, Уæрæсе æмæ Туркæй

ЦХИНВАЛ, 23 апр – Sputnik, Плиты Фатимæ. Хуссар Ирыстоны сгуыхт артист Тасойты Игорь хайад исы æппæтуæрæсейон гом онлайн-фестиваль "Спасибо за Победу!"-йы, кæцы нывонд у Стыр Уæлахизы 75 азы сæххæстæн.

Секстеты архайынц зарæггæнджтæ АИШ, Украина, Герман, Уæрæсе, Туркæй æмæ Хуссар Ирыстонæй.

"Мах æхсæз зарæггæнæгæй æндæр æмæ æндæр бæстæтæй бавдыстам зæронд хæстон зарæг "Песня военного корреспондента". Уымæй мах иууылæр цыт кæнæм, Стыр Фыдыбæстон хæты быдыры чи баззад æмæ сæрæгас цы ветерантæ сты, уыдонæн. Зарæг мыхуыр æрцыд федерлон канал "Победа"-ыл, - загъта Sputnik зарæггæнæг.

Проект конд у цалдæр этапæй, хатдзæгтæ сараздзысты Стыр Уæлахизы боны хæдразмæ.

"Радон этапты мах фæнд кæнæм сæххæст кæнын ахæм зарджытæ куыд "В лесу прифронтовом", "Журавли", 9 маймæ æввахс та азардзыстæм "День Победы". Мæн ма фæнды цæмæй ацы проекты фæлгæтты айзæла "Венский вальс" дæр, - бафтыдта уый.

29
Рауагъдон бал

Хуссар Ирыстоны равзӕрстой фӕстаг дзӕнгӕрӕг ӕмӕ рауагъдон балы датӕтӕ

139
(ранӕуӕггонд 21:26 02.06.2020)
Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ

ЦХИНВАЛ, 2 июн - Sputnik, Плиты Фатимӕ. Хуссар Ирыстоны ахуырады министрады равзӕрстой фӕстаг дзӕнгӕрӕг ӕмӕ рауагъдон балы датӕтӕ, фехъусын кодтой Sputnik уагдоны пресс-службӕйы.

Хуссар Иры рауагъдонты сӕйраг бӕрӕгбонон мадзӕлтты датӕтӕ не 'нтыст сбӕлвырд кӕнын коронавирусы апарахаты тасӕй тобӕтӕ хынцгӕйӕ.

"Развӕлгъау сбӕлвырд кодтам 17 июны ауадзын фӕстаг дзӕнгӕрӕг ӕмӕ 18 июны та рауагъдон бал. Раздӕрау та йӕ организаци фӕнд кӕнӕм бакӕнын сывӕллӕтты сфӕлдыстадон галуаны бӕрны. Фӕлӕ уыдон дырыс датӕтӕ не сты ӕмӕ сӕ ауадзын баст уыдзӕн коронавирусы фӕдыл уавӕримӕ", - загътой пресс-службӕйы.

Рауагъдон бал хицӕнӕй ауадзынц ӕрвылаз Дзауы районы дӕр.

"Дзауы районы ахуырдзаутӕн сӕ бал республикӕйы скъолатимӕ иумӕ Цхинвалы банхъардзысты ауадзын, фӕлӕ ацы фарст нырма скъуыддзаг нӕу", - загътой ахуырады министрады.

Хуссар Ирыстоны ацы аз скъолайӕн хӕрзбон зӕгъдзысты 468 ахуырдзауы, уыдонӕй цыппар иттӕг хорз нысӕнттыл. Иу чызг у сызгъӕрин майданмӕ претендент. Цыппар иууыл хуыздӕр бӕрӕггӕнӕнтимӕ ахуырдзауы сты гимназитӕ "Рухс" ӕмӕ "Альбион"-ӕй.

139
МСНК кусджытӕ

МХМ къордтӕ райдыдтой цӕттӕ кӕнын Уӕлахизы парадмӕ Цхинвалы

7
(ранӕуӕггонд 16:00 02.06.2020)
Хуссар Ирыстоны Мидхъуыддӕгты министрады кусджытӕ райдыдтой рӕнхъон тренировкӕтӕ Милицийы сӕрмагонд нысаниуӕджы къорды бӕстыхайы

ЦХИНВАЛ, 2 июн - Sputnik. Хуссар Ирыстоны Мидхъуыддӕгты министрады (МХМ) парадон къордтӕ, кӕцытӕ хайад райсдзысты бӕрӕгбонон маршы Цхинвалы центры, райдыдтой рӕнхъон цӕттӕкӕнынад, хъусын кӕны МХМ пресс-службӕ.

Амӕйразмӕ республикӕйы президент Бибылты Анатолий фехъусын кодта, Стыр Фыдбӕстон хӕсты Уӕлахизы 75 азы юбилейы цытӕн бӕрӕгбонон парад кӕй ацӕудзӕн Хуссар Ирыстоны столицӕйы 24 июны. Майы республикӕйы ацыдысты сӕрмагонд парадтӕ Стыр Фыдыбӕстон хӕсты ветерантӕн.

"Ныртӕккӕ парадон къордтӕ кусынц рӕнхъон цӕттӕкӕнынадыл. Парады хайад райсынмӕ цӕттӕ кӕнынц мидхъуыддӕгты органты 200-мӕ ӕввахс кусӕджы – сылгоймӕгты парадон къорд, милицийы сӕрмагонд нысаниуӕджы къорды кусджытӕ, афтӕ ма Хуссар Ирыстоны МХМ курсанттӕ, кӕцытӕ ахуыр кӕнынц УФ МХМ профилон ахуырадон уагдӕтты", - радзырдтой уагдоны.

Афтӕ ма парады рацӕудзӕн милицийы сӕрмагонд нысаниуӕджы къорды (МСНК) бронетехникӕ дӕр – цыппар БТР-80. Нырма репетицитӕ цӕуынц МСНК бӕстыхайы, уый фӕстӕ уыдон адарддӕр уыдзысты республикӕйы Хъахъхъӕнынады министрады ӕмӕ УФ 4-ӕм ӕфсӕддон базӕйы плацыл. Уӕлахизы парады генералон репетицитӕ уагъд цӕудзысты Театралон фӕзуатыл 19-22 июны.

7